Əlcəzairlə əməkdaşlığa dair ilk sənəd imzalanıb

Əlcəzairlə əməkdaşlığa dair ilk sənəd imzalanıb
  20 Aprel 2017    Oxunub:1234
Ölkəmiz İslam və ərəb dünyası ilə əlaqələrə xüsusi əhəmiyyət verir. Dövlət başçısı tərəfindən 2017-ci ilin "İslam Həmrəyliyi İli"nin elan olunması çərçivəsində dost Əlcəzair Xalq Demokratik Respublikası ilə ikitərəfli münasibətlərin inkişafı məqsədi ilə iki ölkənin Ədliyyə nazirlikləri tərəfindən danışıqlar aparılaraq əməkdaşlıq haqqında Anlaşma Memorandumunun qısa müddətdə layihəsi razılaşdırılıb.
Həmin sənədin imzalanması üçün Əlcəzairin ədliyyə naziri Əl-Tayyib Louhun dəvəti ilə Azərbaycanın ədliyyə naziri Fikrət Məmmədov aprelin 16-18-də nümayəndə heyəti ilə bu ölkədə səfərdə olub.

Ədliyyə Nazirliyi Mətbuat xidmətindən AzVision.az–a verilən xəbərə görə, səfər zamanı ədliyyə nazirlərinin səmimi və dostluq şəraitində keçirilmiş görüşündə əməkdaşlığın perspektivləri müzakirə olunub, hər iki dövlətdə ədliyyə və məhkəmə sistemində aparılan islahatlar ətrafında geniş fikir mübadiləsi aparılıb, ölkəmizdə təməli ümummilli lider Heydər Əliyev tərəfindən qoyulmuş və Prezident İlham Əliyevin rəhbərliyi ilə məhkəmə-hüquq sisteminin müasirləşdirilməsi üzrə görülən işlərə və əldə olunan nailiyyətlərə böyük maraq göstərilərək, təcrübə mübadiləsinin aparılmasının hər iki tərəf üçün faydası qeyd olunub.

Sonra nazirliklər arasında məhkəmə, ədliyyə, o cümlədən penitensiar sistemin təkmilləşdirilməsi, elektron ədliyyə, qanunvericilik, ədliyyə işçilərinin və hakimlərin tədrisi sahəsində birgə tədbirlərin keçirilməsini nəzərdə tutan əməkdaşlıq haqqında Anlaşma Memorandumu imzalanıb, mətbuat üçün brifinq keçirilib.

Qeyd olunub ki, Azərbaycandan Əlcəzairə nazir səviyyəsində ilk edilən bu səfər tarixi hadisə olmaqla münasibətlərimizin inkişafına təkan verəcək. Eyni zamanda, Anlaşma Memorandumu iki ölkə arasında əməkdaşlığa dair imzalanan ilk sənəd olmaqla müqavilə-hüquq bazasının təməlini qoyub və qarşılıqlı fəaliyyətin müxtəlif sahələrdə dərinləşməsinə dəyərli töhfə olacaqdır. Əlcəzairli nazir Azərbaycanda gedən proseslərdən məlumatlı olduğunu bildirərək, ölkəmizin sürətli inkişafında, əmin-amanlığın və sabit vəziyyətin təmin olunmasında ölkə Prezidenti cənab İlham Əliyevin müstəsna rolunu və xidmətlərini vurğulayıb.

Bununla yanaşı, Əlcəzairin Ədliyyə Nazirliyi tərəfindən əhaliyə göstərilən elektron xidmətlərə dair təqdimat keçirilib, bu sahədə təcrübə mübadiləsi aparılıb, Azərbaycanın brendi olan və ədliyyənin də müxtəlif xidmətlər göstərdiyi ASAN xidmətin vətəndaş məmnunluğunu təmin edən fəaliyyəti barədə məlumat verilib.

Səfər zamanı Əlcəzairin Baş naziri Abdelmalek Sellal ilə görüş keçirilib. İki ölkənin din və mədəniyyət kimi ortaq dəyərlərə malik olduğunu söyləyən Baş nazir hazırkı səfərin və imzalanmış sənədin mühüm əhəmiyyətini qeyd edib, Əlcəzairin Azərbaycanla bütün istiqamətlərdə, xüsusilə iqtisadi, hüquqi, ticarət, neft-qaz və mədəniyyət sahələrində əməkdaşlığın aparılmasında maraqlı olduğunu bildirib, bunun üçün böyük potensialın mövcudluğunu vurğulayıb. Baş nazir ölkəsinin Afrikada nüfuza malik olduğunu bildirərək qitə ölkələri ilə əlaqələrin inkişafında Azərbaycana kömək etməyə hazır olduğunu söyləyib.

Görüşdə Azərbaycanda ədliyyə və məhkəmə sistemində aparılan islahatlara maraq göstərilib, bu sahədə təcrübə mübadiləsinin hər iki tərəf üçün faydası qeyd edilib. Ədliyyə naziri F.Məmmədovun Əlcəzairin Ali Məhkəməsinin sədri və Baş prokuroru ilə də görüşü olub. Görüşdə ədalət mühakiməsinin səmərəliliyi, məhkəmələrə müraciət imkanlarının asanlaşdırılması, elektron məhkəmənin tətbiqi, hakimlərin seçimi və tədrisi müzakirə edilib, ikitərəfli əməkdaşlığın genişləndirilməsinə böyük maraq göstərilib, məhkəmənin binası ilə tanış olunub.

Eyni zamanda, Ali Magistratlar (Hakimlər və Prokurorlar) Məktəbinə səfər edilərək həmin qurumun fəaliyyəti, hakimlərin və prokurorların ilkin və davamlı tədrisi prosesi ilə tanış olunub, əməkdaşlığa dair faydalı danışıqlar aparılıb.

Azərbaycan Prezidentinin tapşırığına əsasən penitensiar sistemin təkmilləşdirilməsi, infrastrukturun yenilənməsi ilə bağlı islahatların həyata keçirildiyi nəzərə alınaraq ölkəmizin nümayəndə heyəti, həmçinin Əlcəzairin yeni inşa olunmuş müasir penitensiar kompleksinə baş çəkərək qurumun fəaliyyəti, məhkumların saxlanma şəraiti, habelə probasiya xidməti, eləcə də Həbsxana Əməkdaşlarının Milli Məktəbində penitensiar xidmət üçün kadrların hazırlanması sistemi ilə maraqlanıb, bu sahədə faydalı təcrübə mübadiləsi aparılıb.

Nümayəndə heyəti, həmçinin Əlcəzairin Milli Notariuslar Palatasının fəaliyyəti ilə tanış olaraq səmərəli fikir mübadiləsi aparıb, Azərbaycanın notariat institutuna maraq göstərilib. Bütün görüşlərdə həmsöhbətlərin diqqəti Ermənistan-Azərbaycan, Dağlıq Qarabağ münaqişəsinin acı nəticələrinə, torpaqlarımızın 20%-nin işğalı və bir milyondan çox soydaşımızın qaçqın və məcburi köçkün vəziyyətinə düşməsi faktına cəlb olunmaqla, münaqişəyə dair broşürlər və digər əyani vəsaitlər təqdim edilib. Tədbirlərdə ölkəmizin Əlcəzairdəki səfiri Mahir Əliyev iştirak edib.

AzVision.az


Teqlər: Azərbaycan   Əlcəzair  





Xəbər lenti