“Harada xurafat varsa, orada dini radikalizm var”

“Harada xurafat varsa, orada dini radikalizm var”
  30 Sentyabr 2017    Oxunub:1438
"Müsəlman dünyasında həmrəyliyə ciddi ehtiyac var"
Dini Qurumlarla İş üzrə Dövlət Komitəsinin (DQİDK) Mətbuat Xidmətindən AzVision.az-a verilən məlumata görə, bunu DQİDK sədri Mübariz Qurbanlı Masallı şəhərindəki Heydər Əliyev Mərkəzində “İslam həmrəyliyi: müasir çağırışlar və dini maarifləndirmə” mövzusunda bu gün keçirilən konfransda çıxışında deyib.

DQİDK və Masallı Rayon İcra Hakimiyyətinin birgə təşkilatçılığı ilə ”İslam Həmrəyliyi İli” çərçivəsində keçirilən tədbirdə Cəlilabad, Masallı və Yardımlı rayonlarının icra orqanlarının nümayəndələri, bələdiyyələrin sədrləri, din xadimlləri, dini icmaların və ictimaiyyətin təmsilçiləri iştirak ediblər.

Tədbir iştirakçıları əvvəlcə DQİDK-nın sifarişi ilə çəkilmiş, Azərbaycanın suverenliyi və ərazi bütövlüyü uğrunda şəhid olanların xatirəsinə həsr olunmuş “Şəhadət” sənədli filmə baxıblar.

Konfransda çıxış edən Masallı Rayon İcra Hakimiiyyətinin başçısı Rafil Hüseynov rayonda dövlət-din münasibətləri istiqamətində görülən işlərdən, həyata keçirilən tədbirlərdən danışıb.

DQİDK sədri M.Qurbanlı çıxışında “Şəhadət” filminin əsas qayəsi barədə danışaraq Vətən uğrunda şəhid olanların böyük xalq sevgisinə layiq olduğunu, özgə torpaqlarında dini radikal qruplarda döyüşənlərin isə elin qınağına çevrildiyini bildirib.

Ölkədə dövlət-din münasibətlərinin qanunla tənzimləndiyini vurğulayan M.Qurbanlı Azərbaycanda dövlət-din münasibətlərinin yüksək səviyyədə olduğunu, müxtəlif xalqların nümayəndələrinin öz dini ayinlərini sərbəst, azad şəkildə icra etdiyini diqqətə çatdırıb.

Müsəlman dünyasında həmrəyliyə ciddi ehtiyacın olduğunu qeyd edən Komitə sədri İslam adı altında müxtəlif cərəyanların yaranmasına və xurafata qarşı barışmaz mövqe nümayiş etdirməyin vacibliyini diqqətə çatdırıb: “Harada xurafat varsa, orada dini radikalizm var”-deyə o bildirib.

Konfransda Qafqaz Müsəlmanları İdarəsinin cənub bölgəsi üzrə qazısı Mirqiyas Təhməzov və Masallı Rayon Ağsaqqallar Şurasının sədri Əlləşrəf Niftiyev mövzuyla bağlı çıxış ediblər.

Həmin gün Masallı şəhərindəki Gənclər Mərkəzində konfransın ikinci panelində “Dini radikalizmlə mübarizə və gənclərin maarifləndirilməsi” mövzusunda müzakirələr aparılıb.

Tədbirdə DQİDK-nın sədr müavini Gündüz İsmayılov, Masallı Rayon İcra Hakimiyyəti başçısı Aparatının ictimai-siyasi məsələlər şöbəsinin müdir müavini, dini qurumlarla işin təşkilatçısı Ceyhun Bəşirov, Rayon Gənclər və İdman İdarəsinin rəisi Camal Manafov, DQİDK-nın Dini maarifləndirmə işinin təşkili şöbəsinin müdir müavini Ruslan Əsgərov mövzuyla bağlı çıxış ediblər.

DQİDK-nın sədr müavini Gündüz İsmayılov çıxışnda qeyd edib ki, dini radikalizmə qarşı effektiv mübarizə üsullarından biri milli-mənəvi dəyərləri dərindən öyrənmək, təbliğ və təşviq etməkdir.

Qeyd olunub ki, milli-mənəvi dəyərlər geniş anlayış olaraq bütün sahələri əhatə etməklə bərabər, İslam dəyərlərimizi də özündə ehtiva edir. İslam dəyərləri isə olduğu kimi qorunmalı, öyrədilməli, gənc nəslə çatdırılmalıdır.

G.İsmayılov çıxışında diqqətə çatdırıb ki, əgər kimsə din adı altında öz məqsədinə çatmaq üçün İslamdan istifadə etmək istəyirsə, onun qarşısında durmaq lazımdır. İslami dəyərlər insanlığa, bəşəriyyətə xidmət edən dəyərlərdir. Lakin, bu dəyərlərdən siyasi, iqtisadi maraqlar üçün istifadə həmin dəyərlərdən uzaqlaşmaq deməkdir. Gənclərimizi, eləcə də cəmiyyətin bütün təbəqələrini intensiv aparılan dini maarifləndirmə yolu ilə məlumatlandırmalı, dini biliklərini zənginləşdirməliyik. Bu maarifçilik işi təkcə təhsil müəssisələrində deyil, kənd, qəsəbə, şəhər, rayonlarda, mədəniyyət müəssisələrində, qeyri-hökumət təşkilatlarında və digər yerlərdə aparılmalıdır.

Tədbirin sonunda gəncləri maraqlandıran suallar cavablandırılııb.

AzVision.az


Teqlər: Mübariz-Qurbanlı  





Xəbər lenti