Arye Qut və Elxan Şahinoğlu rəhbər təyin edilib

  25 Oktyabr 2017    Oxunub : 1521
Arye Qut və Elxan Şahinoğlu rəhbər təyin edilib

Qərb Universitetində Tətbiqi Politologiya Mərkəzi yaradılıb.

AzVision.az xəbər verir ki, mərkəzə rəhbərlik tanınmış politoloq, “Atlas” Araşdırmalar Mərkəzinin rəhbəri Elxan Şahinoğluna həvalə edilib.

Mərkəz beynəlxalq aləmdə və bölgədə baş verən hadisələri tələbələrin iştirakı ilə tədqiq edəcək, müzakirəyə çıxaracaq, analizlər apararaq hesabatlar hazırlayacaq. Burada mütəmadi olaraq yerli və beynəlxalq ekspertlərin, politoloqların, eyni zamanda diplomatların iştirakı ilə diskussiyalar, dəyirmi masalar və görüşlər təşkil ediləcək.



Tətbiqi Politologiya Mərkəzi politologiya sahəsi üzrə təhsil alan tələbələrin dünyada və bölgədə baş verən hazırkı siyasi proseslərlə daha yaxından tanış olması, təhlillər aparması, beləliklə də həm onların analitik qabiliyyətinin inkişaf etdirilməsi, həm də daimi olaraq ən son proseslər barədə məlumatlı olmasına kömək edəcək.

Mərkəzin nəzdində iki laboratoriya - “Qarabağ” və “Multikulturalizm” laboratoriyaları formalaşdırılıb. Bu laboratoriyalar müvafiq istiqamətlər üzrə tədqiqat və təhlil işlərini həyata keçirəcək.

Məlumat üçün bildirək ki, “Multikulturalizm” laboratoriyasına rəhbərliyi beynəlxalq münaqişələr üzrə tanınmış ekspert, Qərb Universitetinin 1997-ci il məzunu Arye Qut həyata keçirəcək.

Anar Kəlbiyev
AzVision.az

Teqlər: Qərb-Universiteti