Nazirin sözlərinə görə, Moskvada intensiv və konkret mövzular ətrafında müzakirələr aparılıb.

“Rusiyalı həmkarıma bildirdim ki, münaqişənin nizamlanmasını irəli çəkməyə imkan verən bir sıra yanaşma mövcuddur. ATƏT-in Minks qrupu həmsədrləri də dəfələrlə qeyd ediblər ki, münaqişə zonasında mövcud vəziyyəti heç kəs qəbul etmir. Status-kvo qəbuledilməzdir və qeyri-sabitdir. Köhnə və yeni ideyaların hamısı masa üzərindədir. Biz bu ideyalardan tərəflər üçün məqbul olan vahid sənəd yaratmalıyıq. Problem asan olsaydı, çoxdan həll olunmuşdu”.

Nazir bildirib ki, BMT Təhlükəsizlik Şurasının qətnamələrinin son tarixi yoxdur: “ Qətnamə yerinə yetirilməyənə qədər qüvvədə qalır. BMT qətnamələrində Ermənistan silahlı qüvvələrinin Azərbaycan torpaqlarından qeyd-şərtsiz çıxarılması tələb edilir. Mən bu qətnamələrin yerinə yetiriləcəyinə şübhə etmirəm. Biz bu istiqamətdə irəliləyirik”.

Məmmədyarov qeyd edib ki, iki ölkə arasında əməkdaşlığın hazır ki vəziyyəti 2008-ci ildə imzalanan dostluq və əməkdaşlıq bəyannaməsində əksini tapıb: “İki ölkə bu sənədə uyğun addımlar atır. Ticarət dövriyyəsi ilbəil artır. Azərbaycan, Rusiya və İran prezidentlərinin müzakirəsindən irəli gələn məsələlərdən biri Şimal-Cənub Nəqliyyat Dəhlizinin işə salınmasıdır. Bunun potensiyalı genişdir. Həm də yüklərin daşınması yolunu qısaldır”.

Eldar Tanrıverdiyev
AzVision.az