“Azərbaycan müstəqil xarici siyasət formalaşdırıb” - Prezident

  23 Yanvar 2018    Oxunub : 1109
“Azərbaycan müstəqil xarici siyasət formalaşdırıb” - Prezident

“Azərbaycanın torpaqlarımızın 20 faizini işğal edən Ermənistan istisna olmaqla bütün qonşuları ilə yaxşı münasibətləri var. Bizim Xəzər dənizi və quru yolu ilə bütün qonşularla xüsusi əməkdaşlıq münasibətlərimiz mövcuddur”.

AzVision.az xəbər verir ki, bunu Azərbaycan Prezidenti İlham Əliyev Davos İqtisadi Forumunun “Strateji baxış: Avrasiya” sessiyasında aparıcının sualına cavab olaraq deyib.

“Ölkəmiz gəncdir, cəmi 26 yaşı var. Lakin Azərbaycan özünü əsl müstəqil ölkə kimi təsdiq edə, müstəqil xarici siyasət formalaşdıra bilib. Bu xarici siyasət bizim milli maraqlarımıza uyğundur və qonşularımızın maraqlarına zidd deyil. Qonşuluq həm problem, həm də üstünlük ola bilər. Bu, ölkənin yürütdüyü siyasətdən və qonşularla əlaqələrdən asılıdır. Düşünürəm ki, hər bir ölkə üçün qonşuları ilə münasibətləri prirotet olmalıdır.

Bu, xüsusilə bizim region üçün aktualdır. Qonşularla açıq ürəkli və praqmatik münasibətlər qurmaq lazımdır. Bu, həm özünün milli maraqlarını müdafiə etmə, həm də qonşuların milli maraqlarını nəzərə alma əsasında olmalıdır. Bununla belə, Azərbaycan sərhədlərində də təhlükəsizliyini təmin etməlidir”, - deyə İlham Əliyev qeyd edib.

Eldar Tanrıverdiyev
AzVision.az

Teqlər: İlham-Əliyev   Prezident   Davos   Forum