Nazir Xocalı soyqırımını tanıyan ölkəyə təşəkkür etdi

Nazir Xocalı soyqırımını tanıyan ölkəyə təşəkkür etdi
  16 Mart 2018    Oxunub:1417
Xarici işlər naziri Elmar Məmmədyarov Paraqvay Senatının sədrini qəbul edib. Xarici işlər naziri Elmar Məmmədyarov Nizami Gəncəvi Beynəlxalq Mərkəzinin təşkilatçılığı ilə keçirilən VI Qlobal Bakı Forumunudan iştirak etmək məqsədilə ölkəmizdə səfərdə olan Paraqvay Respublikası Senatının sədri Fernando Luqo Mendezi qəbul edib.
Xarici İşlər Nazirliyindən AzVision.az-a verilən məlumata görə, Azərbaycana səfərindən və VI Qlobal Bakı Forumda iştirakından, eyni zamanda keçirilmiş ikitərəfli görüşlərdən məmnunluq duyan F.L.Mendez Azərbaycan Respublikasının Prezidenti Zati-aliləri cənab İlham Əliyev ilə görüşündə məhsuldar fikir mübadiləsi aparıldığını bildirdi.

Habelə, qonaq sözügedən forumun Azərbaycanı, o cümlədən regionu tanımaq, həmçinin Azərbaycan və Paraqvay münasibətlərinin gələcək perspektivləri barədə düşünmək üçün fundamental platforma olduğunu qeyd etdi.

Görüşdə Azərbaycan və Paraqvay arasında əlaqələrin inkişaf etdirilməsi üçün hər iki ölkənin geniş potensiala malik olduğu vurğulandı. Bu xüsusda, parlament diplomatiyasının, o cümlədən hər iki ölkənin parlament nümayəndə heyətlərinin qarşılıqlı səfərlərin həyata keçirilməsinin, iki ölkənin XİN-lərarası siyasi məsləhətləşmələrin təşkilinin əhəmiyyəti qeyd edildi.

Nazir Elmar Məmmədyarov 10 sentyabr 2015-ci il və 25 oktyabr 2017-ci ildə Paraqvay Respublikasının Milli Konqresinin Deputatlar Palatası tərəfindən Xocalı soyqırım ilə əlaqədar bəyanatların qəbul edilməsi və bu faciənin qurbanları ilə həmrəyləyin ifadə olunmasına görə Paraqvay Respublikasının Milli Konqresinə təşəkkürünü ifadə etdi.

Görüşdə regional və beynəlxalq mövzular ətrafında fikir mübadiləsi aparıldı.

Eldar Tanrıverdiyev
AzVision.az



Teqlər: XİN  





Xəbər lenti