Avropa İttifaqı-Azərbaycan alt komitəsinin iclası keçirilib

  19 Mart 2018    Oxunub : 435
Avropa İttifaqı-Azərbaycan alt komitəsinin iclası keçirilib
Brüsseldə Avropa İttifaqı (Aİ)- Azərbaycan Əməkdaşlıq Komitəsi çərçivəsində Məşğulluq və sosial məsələlər, ictimai səhiyyə, təlim, təhsil və gənclər, mədəniyyət, informasiya cəmiyyəti və audiovizual siyasət, elm və texnologiya məsələləri üzrə alt-komitənin beşinci iclası keçirilib.
Təhsil Nazirliyinin mətbuat xidmətindən AzVision.az-a verilən məlumata görə, Azərbaycan tərəfindən Təhsil Nazirliyinin həmsədrlik etdiyi iclas martın 16-da olub. İclasda Əmək və Əhalinin Sosial Müdafiəsi Nazirliyi, Gənclər və İdman Nazirliyi, Mədəniyyət və Turizm Nazirliyi, Səhiyyə Nazirliyi, Milli Elmlər Akademiyası və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndələrindən ibarət heyət iştirak edib.

Bir gün ərzində davam edən iclas zamanı təhsil, məşğulluq və sosial məsələlər, səhiyyə, gənclər siyasəti, mədəniyyət, tədqiqat və innovasiyalar, informasiya cəmiyyəti mövzularında qarşılıqlı müzakirələr aparılıb. Azərbaycan tərəfi sözügedən sahələrdə həyata keçirilən islahatlar və əldə olunan nəticələrlə bağlı məlumat verıb. Öz növbəsində Aİ nümayəndə heyəti bu sahələr üzrə həyata keçirilən siyasət və nəzərdə tutulmuş dəyişiklərlə bağlı təqdimatlar edib.

İclasın gedişində Azərbaycan və Avropa İttifaqı arasında sözügedən alt-komitənin əhatə etiyi sahələr çərçivəsində əməkdaşlığın inkişaf etdirilməsi, yeni layihələrin həyata keçirilməsi üçün qarşılıqlı fikir mübadiləsi aparılıb.

Qeyd edək ki, 2012-ci ildən etibarən mütəmadi keçirilən iclasın sonuncusu 2016-cı ilin oktyabr ayında Bakıda olub.

AzVision.az

Teqlər:   Azərbaycan   Forum