Nazir ATƏT sədri ilə Qarabağı müzakirə edib
Nazirlər Cənubi Qaz Dəhlizi və onun vacib hissələri olan TANAP və TAP layihələrinin əhəmiyyətini diqqət çəkdilər və bu xüsusda ölkələrimiz arasında olan əməkdaşlığı təqdir etdilər.
Tərəflər Azərbaycanın Avropa İttifaqı ilə əməkdaşlıq məsələsinə toxundular. İtaliya xarici işlər naziri ölkəsinin Azərbaycanın Avropa İttifaqı ilə əməkdaşlığının genişlənməsini dəstəklədiyini dedi.
Görüşdə İtaliyanın ATƏT fəaliyyətdə olan sədri statusuna toxunuldu. İtaliya xarici işlər naziri ölkəsinin Ermənistan-Azərbaycan Dağlıq Qarabağ münaqişəsinin diplomatik yollarla ATƏT-in Minsk Qrupunun həmsədrlərinin vasitəçiliyi ilə beynəlxalq hüququn norma və prinsipləri və Helsinki Yekun Aktı əsasında həllini dəstəklədiyini vurğuladı.
Nazir Elmar Məmmədyarov İtaliyanın münaqişənin həlli ilə əlaqədar ədalətli mövqeyinə görə təşəkkür etdi. O, Ermənistan-Azərbaycan Dağlıq Qarabağ münaqişəsinin həlli üzrə danışıqlar prosesi haqqında məlumat verərək Ermənistanın BMT Təhlükəsizlik Şurasının işğalçı qoşunların Azərbaycanın işğal olunmuş ərazilərindən dərhal, tam, qeyd-şərtsiz çıxarılması barədə tələblərini hələ də yerinə yetirmədiyini vurğuladı.
O əlavə etdi ki, güc tətbiq edərək dövlətlərin beynəlxalq səviyyədə tanınmış sərhədlərinin pozulması qəbuledilməzdir və münaqişə BMT Təhlükəsizlik Şurasının müvafiq qətnamələri, Helsinki Yekun Aktında təsbit olunduğu kimi Azərbaycanın beynəlxalq səviyyədə tanınmış sərhədləri çərçivəsində ərazi bütövlüyü və suverenliyi əsasında həll edilməlidir.
Görüşdə həmçinin beynəlxalq təşkilatlar çərçivəsində əməkdaşlıq, həmçinin qarşılıqlı maraq kəsb edən regional məsələlər ətrafında fikir mübadiləsi aparıldı.
Eldar Tanrıverdiyev
AzVision.az
Teqlər: XİN Məmmədyarov İtaliya