Prezident seçkilərində səsvermə başladı - (VİDEO)

Prezident seçkilərində səsvermə başladı - (VİDEO)
  11 Aprel 2018    Oxunub:3633
Azərbaycanda prezident seçkiləri üzrə səsverməyə start verilib.
AzVision.az xəbər verir ki, səsvermə saat 08:00-da başlayıb 19:00-da sona çatacaq. Səsvermə 125 seçki dairəsi üzrə 5641 seçki məntəqəsində keçirilir. Seçkiləri 894 beynəlxalq, 58 min 175 yerli müşahidəçi izləyir.



“Els" Müstəqil Araşdırmalar Mərkəzi, “RƏY” Monitorinq Mərkəzi, Vətəndaşların Əmək Hüquqlarını Müdafiə Liqası ABŞ-ın “Artur Finkelşteyn və Assosiasiya” şirkəti ilə birlikdə və Vətəndaş Cəmiyyəti uğrunda Müstəqil Məsləhət və Yardım Mərkəzi Fransanın “Opinion Way” təşkilatı ilə birlikdə prezident seçkilərində "exit-poll" keçirir.

Azərbaycanda səsvermə hüququ olan vətəndaşların sayı 5 milyon 314 min 365 nəfərdir. Seçkiləri 50-dən çox xarici KİV-in 118 təmsilçisi işıqlandırır.

Qeyd edək ki, prezident seçkilərində 8 namizəd mübarizə aparır. Bunlar prezidentliyə namizədliyi hakim Yeni Azərbaycan Partiyası tərəfindən irəli sürülən İlham Əliyev, namizədliyi Bütöv Azərbaycan Xalq Cəbhəsi Partiyası tərəfindən irəli sürülən Qüdrət Həsənquliyev, namizədliyi Azərbaycan Sosial Demokrat Partiyası tərəfindən irəli sürülən Araz Əlizadə, namizədliyi Milli Dirçəliş Hərəkatı Partiyası tərəfindən irəli sürülən Fərəc Quliyev, namizədliyi “Cəbhəçilərin təşəbbüs qrupu” tərəfindən irəli sürülən Razi Nurullayev, namizədliyi Müasir Müsavat Partiyası tərəfindən irəli sürülən Hafiz Hacıyev, öz təşəbbüsü ilə namizədliyini irəli sürən Zahid Oruc və namizədliyi Azərbaycan Demokrat Partiyası tərəfindən irəli sürülən Sərdar Məmmədovdur (Cəlaloğlu).

Elvin Abdulqədirov
AzVision.az


Teqlər: Seçki   Səsvermə  





Xəbər lenti