Sarkisyan həbs oluna bilər

  30 İyul 2018    Oxunub : 2689
Sarkisyan həbs oluna bilər
“Ermənistanda sabiq prezident Robert Koçaryan və digərlərinin həbsi İrəvan klanın "Qarabağ klanı" üzərində apardığı haqq-hesabdır. Eyni zamanda baş nazir Paşinyanı müdafiə edən, küçələrdə onunla birlikdə “məxməri inqlab”ın ideyalarını reallaşdırmağa çalışan insanların tələbidir”.
Bu fikirləri AzVision.az-a açıqlamasında politoloq Qabil Hüseynli deyib. O, qeyd edib ki, bu gün Paşinyanın həmin insanların maddi rifahını, əmək haqqını, müavinətlərini qaldırmağa imkanı yoxdur. Amma Paşinyan düşünür ki, onu müdafiə edənləri nə iləsə təsəlli verməlidir.

"Yəni, ölkədə kifayət qədər cinayətlər törətmiş, ölkənin malını-mülkünü talamış, rüşvət və korrupsiya yolu ilə böyük sərvət toplamış insanlara qarşı aparılan mübarizə həmin insanların qarnını doyurmasa da, təskinlik verir. Çünki həmin adamlar belə düşünür ki, Paşinyan ölkədə haqqın, ədalətin bərpa olunması uğrunda mübarizə aparır. Korrupsioner dövlət qulluqçularını, əli erməni xalqının qanına batmış sabiq prezidenti və ətrafında olan hərbiçiləri sıradan çıxarır. Bu baxımdan Paşinyan bir güllə ilə iki dovşan vurur”.



Politoloq hesab edir ki, Ermənistanda başladılan proseslər davamlı olacaq. Onun sözlərinə görə, sabiq prezident Serj Sarisyan da həbs oluna bilər: “İndiyə qədər Serj Sarkisyanın yalnız qardaşı həbs olunub. Amma Serj Sarkisyanın da rüşvət və korrupsiya olayları ilə bağlı cinayətləri var. Bu baxımdan onlar da araşdırılır. Serj Sarkisyan müalicə adı altında ölkədən çıxsa da, üzərindəki qara buludlar çəkilməyib. Güman edirəm ki, bu məsələlərin bir ucu da Robert Koçaryanın zamanında müdafiə naziri, ardından ölkənin prezidenti olmuş Serj Sarkisyana da çatacaq. Beləliklə də “Qarabağ klanı”nın başçıları və fəal icraçıları sıradan çıxarılacaq. Paşinyan isə bunu erməni xalqına ədalətin təntənəsi kimi təqdim edəcək. Hadisələr mürəkkəb ssenari üzrə davam edir və onun daha da gərginləşəcəyini istisna etmək olmaz”.

Q.Hüseynli deyib ki, bu məsələlərdə Rusiyanı qıcıqlandıran məqamlar da olacaq: “Robert Koçaryan və Serj Sarkisyan Rusiyanın adamı olub. Daha doğrusu Rusiya tərəfindən böyüdülmüş, bəslədilmiş insanlardır. Amma Rusiya üçün vaxtı keçmiş, özünü doğrultmayan siyasətçilər anlayışı var. Nəzərə alsaq ki, Paşinyanın arxasında Avropa və Amerikadakı erməni diasporu dayanır. Onlar həm siyasətdə, həm iqtisadiyyatda kifayət qədər güclüdürlər. Bu nöqteyi-nəzərdən Rusiyanın bu məsələlərdə hər hansı addım atacağını gözləmək çətindir. Amma ola bilsin ki, həbs olunanların azad olunması üçün Rusiyanın müəyyən təzyiqləri olsun”.

Elvin Abdulqədirov
AzVision.az

Teqlər: Ermənistan   Paşinyan   Sarkisyan