Girovun oğlu BQXK-dan narazıdır: “Görüşə icazə vermirlər”

Girovun oğlu BQXK-dan narazıdır: “Görüşə icazə vermirlər”
  14 Sentyabr 2018    Oxunub:2818
Beynəlxalq Qırmızı Xaç Komitəsinin (BQXK) həkimi Kəlbəcərdə girov götürülən azərbaycanlılara baş çəkib.
AzVision.az xəbər verir ki, bu barədə ermənilər tərəfindən girov götürülən Dilqəm Əsgərovun oğlu Kürdoğlu Əsgərov bildirib.

O, həmin həkimlə görüşə icazə verilmədiyini deyib: "Beynəlxalq Qırmızı Xaç Komitəsinin həkimi kəlbəcərli girovlara baş çəksə də, həkimlə şəxsən mənim görüşümə icazə verilmir. Mənə deyirlər ki, sən dövlət işçisisən. Ailədən kim istəsə, həkimlə görüşə bilər, ancaq mən yox. Başa düşə bilmirəm ki, atama baş çəkən həkimlə niyə görüşməyə icazə vermirlər. Mənə atam barəsində məlumat vermirlər. Elə bilirlər ki, Dövlət Təhlükəsizliyi Xidmətinin işçisiyəm. Daha bilmirlər ki, fəhlə işləyirəm. Gedin, araşdırın görün harada işləyirəm. BQXK işçiləri söz vermişdi ki, atamın şəklini və videosunu gətirəcəklər. İndi isə deyirər ki, nə məktub var, nə video".

BQXK-nın Azərbaycan nümayəndəliyinin İctimaiyyətlə əlaqələr şöbəsinin rəhbəri İlahə Hüseynova məsələ ilə bağlı AzVision.az-a bildirib ki, Beynəlxalq Qırmızı Xaç Komitəsinin nümayəndələri avqust ayında Dağlıq Qarabağ münaqişəsi nəticəsində saxlanılan şəxslərə baş çəkiblər. O qeyd edib ki, onların ailələri ilə əlaqə saxlanılır və başçəkmə ilə bağlı məlumat verilir.

"Bizim əməkdaşlar daimi olaraq ailələrlə əlaqədədir" ,- deyə İ.Hüseynova vurğulayıb.

Anar Kəlbiyev
AzVision.az


Teqlər: BQXK   Dilqəm-Əsgərov  





Xəbər lenti