Abdulla Qurbani ürəyindən əməliyyata götürülüb

Abdulla Qurbani ürəyindən əməliyyata götürülüb
  22 Oktyabr 2018    Oxunub:3012
Bir neçə saat öncə Silahlı Qüvvələrin Baş Klinik Hospitalında Əməkdar incəsənət xadimi, Prezidentin fərdi təqaüdçüsü, Müdafiə Nazirliyinin zabiti, Azərbaycan Yazıçılar Birliyinin üzvü, polkovnik Abdulla Qurbaninin açıq ürək əməliyyatı başlanıb.
Azvision.az xəbər verir ki, məlumatı polkovnikin qızı, polis mayoru Günay Qurbanova təsdiqləyərək bildirib ki, uzun illərdir ürək-damar xəstəliklərindən əziyət çəkən atası ürək ağrılarını heç zaman biruzə verməyib və bu günə kimi Vətən qarşısında xidmətlərini şərəflə davam etdirib.

Əməliyyatı tanınmış təcrübəli ürək-damar cərrahı Anar Əmrah və onun komandası aparır və Müdafiə Nazirliyi rəhbərliyinin diqqət mərkəzindədir.

Bildiririk ki, Abdulla Qurbani 1956-cı ilin dekabrında Şərur rayonunun Mahmudkənd kəndində anadan olub. 18 ilə yaxın Mədəniyyət Nazirliyi sistemində məsul vəzifələrdə çalışıb. 1993-cü ildə Şərur rayon Mədəniyyət şöbəsinin müdiri vəzifəsindən könüllü olaraq cəbhəyə yollanıb. Murovdağ uğrunda ilk döyüş əməliyatlarına qoşulan A.Qurbani sıravi əsgərdən "polkovnik" rütbəsinədək yüksəlib. Xidmətləri ölkə rəhbərliyi tərəfindən həmişə yüksək qiymətləndirilib. Prezident sərəncamları ilə" Vətənə xidmətə görə", "Vətən uğrunda", "Hərbi xidmətlərə görə" və digər orden-medallarla təltif olunub. Vətən və xalq qarşısında müstəsna xidmətlərinə görə Prezidentin fərdi təqaüdünə, Azərbaycan incəsənətinin, mədəniyyətinin inkişafında, ölkədə hərbi vətənpərvərliyin təbliğində, Silahlı Qüvvələrin şəxsi heyətinin mənəvi- psixoloji hazırlığının yüksəldilməsində xidmətlərinə görə Əməkdar İncəsənət xadimi və Naxçıvan MR-in Əməkdar mədəniyyət işçisi fəxri adlarına layiq görülüb.

Hərbi vətənpərvərlik mövzusunda 100-dən çox kitabın, yüzlərlə məqalənin, 200-dən çox hərbi marş və vətənpərvərlik mahnılarının sözlərinin müəllifidir. Poemaları əsasında bir çox televiziya tamaşası hazırlanıb, rekviyem-oratoriya, simfonik poema yazılıb. "Türk sancağı", "Daş andı", "Şahnaz muğamı", "Gənclik bir də qayıtmır" pyesləri tamaşaya qoyulub. Respublikanın müxtəlif bölgələrində, eləcə də paytaxt Bakıda təşkil olunan onlarla teatrlaşdırılmış kütləvi mərasimin senari müəllifi və quruluşçu rejissorudur. Möhtəşəm hərbi paradlara aparıcılıq edib, Qarabağ müharibəsinin iştirakçısıdır. "Azərbaycan- Türkiyə: qardaşlığın təntənəsi" kitab-albomu bir neçə gün öncə çapdan çıxıb.

Azvision.az


Teqlər: Abdulla-Qurbani  





Xəbər lenti