Ədliyyə Akademiyasında beynəlxalq konfrans keçirilib
Konfransın açılışında Ədliyyə Akademiyasının rektoru vəzifəsini icra edən Elçin Xələfov milli iqtisadiyyatın inkişafında qanunvericiliyin rolundan, xüsusilə son dövrlər qeyri-neft iqtisadiyyatının genişləndirilməsi ilə bağlı hüquqi əhəmiyyətli yeniliklərdən, sahibkarlıq fəaliyyəti, istehlakçıların hüquqlarının qorunması və xarici investisiyaların təşviqindən danışıb, ölkəmizin davamlı inkişafı, mühüm iqtisadi göstəriciləri barədə ətraflı məlumat verib, konfransın işinə uğurlar arzulayıb.
Almaniya Beynəlxalq Əməkdaşlıq Cəmiyyətinin (GİZ) Azərbaycan üzrə nümayəndəliyinin rəhbəri Sonia Fontaine ölkəmizdə müasir qanunvericilik bazasının mövcud olduğunu, məhkəmə-hüquq sahəsində səmərəli əməkdaşlıq etdiklərini vurğulayıb, Azərbaycanda iqtisadi və hüquqi sahədə həyata keçirilən islahatları yaxından izlədiklərini və dəstəklədiklərini bildirib.
Sonra konfrans öz işini panel sessiyalarda davam etdirib, yerli və xarici ekspertlər tərəfindən ölkəmizdə həyata keçirilən irimiqyaslı iqtisadi, vergi, ekoloji, sosial layihələrin və proqramların hüquqi təminat məsələlərinə, milli və beynəlxalq qanunvericilik aspektinə toxunulub. Həmçinin iqtisadi qanunvericiliyin inkişafı, mübahisələrin alternativ həlli mexanizmləri, mediasiya, məhkəmələrdə baxılan işlərin səmərəliliyinin təmin edilməsində informasiya texnologiyalarının rolu, istehlak hüququnun ümumi aspektləri, sahibkarlıq hüququ və digər mövzularda çıxışlar edilib, müqayisəli hüquqi təhlillər aparılıb, diskussiyalar keçirilib.
Azvision.az
Teqlər: Ədliyyə