Azvision.az xəbər verir ki, bunu Əmək və Əhalinin Sosial Müdafiəsi Nazirliyinin Əlillərin sosial müdafiəsi siyasəti şöbəsinin müdiri Sabir Qocayev “Övladlığagötürmə sahəsində idarəetmənin təkmilləşdirilməsi” mövzusunda keçirilən mətbuat konfransında çıxışı zamanı deyib.

Nazirlik rəsmisi bildirib ki, bu gün övladlığa verilməsində əsas problem 4-5 yaşdan yuxarı uşaqlarla bağlıdır: “Çünki ailələr əsasən daha azyaşlı uşaqları götürmək istəyir. Bundan başqa, ailə uşağından imtina etmirsə, müəssisədə olan həmin uşaqların da övladlığa verilməsi mümkün olmur. Bizim əsas məqsədimiz uşaqların öz ailələrinə qaytarılmasıdır. Bu istiqamətdə ailələrə dəstək olunacaq. Bunun üçün uşağın müəssisəyə yerləşdirilməsi səbəbi araşdırılacaq. Bu ailələrin özünəməşğulluq, məşğulluq prosesi, peşə kurslarına cəlb edilməsi nəzərdə tutulur. Eyni zamanda, maddi vəziyyətdən asılı olaraq uşaqların müəyyən xərclərinin qarşılanması üçün dəstək, icbari sığortadan yararlanması üçün baza mexanizmləri hazırlanır. Hər bir uşaqla fərdi qaydada iş aparılacaq. Əsas məqsəd uşaqların öz ailələrinə qaytarılması üçün dəstək olmaqdır. Bütün bu dəstəkdən sonra uşağına lazımı şərait yaratmayan valideynlər bu hüquqdan məhrum ediləcək”.

Şəhanə Rəhimova
Azvision.az