Ali Məhkəmə 100 könüllü axtarır

  08 Fevral 2019    Oxunub : 880
Ali Məhkəmə 100 könüllü axtarır
Azərbaycan Respublikası Ali Məhkəməsində fəaliyyət göstərəcək könüllülərin qeydiyyatına başlanılıb.
Ali Məhkəmədən Azvision.az -a verilən məlumata görə, 100 nəfər könüllünün qəbulunun nəzərdə tutulduğu Könüllülər Proqramına qoşulan gənclər fəaliyyət göstərdiyi müddət ərzində yeni bilik və bacarıqlar qazanacaq, dünyagörüşlərini daha da artıracaq, hüquq sahəsində öyrəndikləri nəzəri bilikləri praktiki işdə həyata keçirmək şansı əldə edəcəklər.

Əsasən, hüquq fakültələrində oxuyan və hüquq sahəsində işləyən könüllülərin Ali Məhkəmədə fərdi inkişafına hesablanmış müxtəlif təlimlər, seminarlar təşkil ediləcək. Onlar Ali Məhkəmənin ayrı-ayrı şöbələrində təcrübə keçəcək, hakimlərin iş təcrübəsini öyrənəcək, eyni zamanda Elektron Məhkəmə sistemi ilə yaxından tanış olacaqlar.

Könüllü olmaq istəyən gənclərin həvəsi və təmsil etdikləri qurumu layiqincə təmsil etmək arzusu olmalıdır. Könüllü olmaq istəyənin xarici dil bilməsi arzu olunur. Hər həftə Ali Məhkəmədə keçirilən seminarda İnsan Hüquqları üzrə Avropa Məhkəməsinin qəbul etdiyi qərarlar müzakirə olunur və könüllü gənclər həmin seminarda iştirak edəcəklər. Könüllülərlə birgə iş birliyi Ali Məhkəmənin gənclər siyasəti sahəsində həyata keçirdiyi tədbir və layihələrin, eləcə də təqdim edilən dövlət xidmətlərinin tərkib hissəsidir.

Proqrama qoşulmaq istəyənlər bu elektron poçt ünvanına ([email protected]) məktub yaza bilər və ya Ali Məhkəmənin internet səhifəsində (supremecourt.gov.az) “onlayn müraciət” keçidinə daxil olaraq müraciət edə və qeydiyyatdan keçə bilərlər.

Azvision.az

Teqlər: Ali-Məhkəmə