202 brakonyer məsuliyyətə cəlb olunub - Rəsmi

  14 May 2019    Oxunub : 792
 202 brakonyer məsuliyyətə cəlb olunub - Rəsmi
Ötən il və bu ilin ilk dörd ayı ərzində brakonyerliyə qarşı mübarizə çərçivəsində cinayət və inzibati xəta törətdiklərinə görə 202 nəfər məsuliyyətə cəlb olunub.
Azvision.az xəbər verir ki, bunu Su Nəqliyyatında Polis İdarəsinin Brakonyerliyə qarşı mübarizə və balıq ehtiyatlarının mühafizəsi bölməsinin rəisi Elmir Süleymanov deyib.

Onun sözlərinə görə, ekoloji cinayətkarlığa, brokonyerliyə qarşı mübarizə sahəsində Xəzər dənizində və respublikanın digər sututarlarında keçirilmiş tədbirlər nəticəsində 2018-ci il və 2019-cu ilin 4 ayı ərzində Su Nəqliyyatında Polis İdarəsinin İstintaq bölməsində 197 cinayət işinin araşdırılması aparılıb, ekoloji hüquqpozmalar sahəsində 131 inzibati xəta faktı aşkar edilib.

E.Süleymanov əlavə edib ki, cinayət və inzibati xəta törətdiklərinə görə məsuliyyətə cəlb olunan 202 nəfərdən qanunsuz balıqovlamada istifadə olunan 101 ədəd qayıq, 424 tor, 32 mühərrik və başqa ov vasitələri, 16 ton 919 kq müxtəlif növ balıq, 2 min 662 ədəd krivet və digər su bioresursları götürülüb.

"Cinayət hadisələri nəticəsində təbiətə 56 min manat ziyan vurulmuş, inzibati xəta faktları törədənlər 11 min manat cərimə ediliblər. 2019-cu ilin 4 ayı ərzində 72 qanunsuz balıqovlama, 2qanunsuz ov etmə cinayət kaftları aşkar edilmiş, bu sahədə 48 inzibati xəta faktı aşkar edilib".

Aytən Zəhra
Azvision.az

Teqlər: ETSN   Brakonyer   Cəza