Ermənistanı ciddi narahat edən Naxçıvan təlimləri - 4 mühüm mesaj

  07 İyun 2019    Oxunub : 1619
Ermənistanı ciddi narahat edən Naxçıvan təlimləri - 4 mühüm mesaj
Azərbaycan və Türkiyə ordusu Naxçıvanda birgə hərbi təlimlərə başlayıb. Bu təlimlər Naxçıvanda hər il keçirilsə də, Ermənistan mediası budəfəki təlimlərin əleyhinə daha çox yazı yazdı. Müxtəlif versiyalar səsləndirdilər. Ən başlıcası Ermənistan Naxçıvandakı təlimləri özünə qarşı təhlükə kimi qiymətləndirir. Bəzi erməni politoloqlar bu təlimlərin hətta Dağlıq Qarabağda müharibə ehtimalını artıracağını bildirdilər.
Bəs niyə Ermənistan mediası və siyasi ekspertləri budəfəki təlimlərdən daha çox qorxublar?

"Atlas" Araşdırmalar Mərkəzinin rəhbəri, politoloq Elxan Şahinoğlu AzVision.az -a bildirib ki, ermənilərin qorxusu cəbhə bölgəsində və Ermənistandakı siyasi vəziyyətlə bağlıdır.

E.Şahinoğlu qeyd edib ki, atəşkəs daima pozulur və hər iki tərəfdən itkilər qeydə alınır: "Ermənistan qorxur ki, Azərbaycan ordusu hücuma keçə bilər. Digər tərəfdən Ermənistanda qorxurlar ki, Azərbaycan Ermənistandakı daxili siyasi gərginlikdən öz məqsədləri üçün istifadə edə bilər. Ermənistanın qorxusu anlaşılandır. Həqiqətən Azərbaycan siyasi elitasında və cəmiyyətində danışıqlara inam qalmayıb, ordunun imkanlarından istifadə edilməsi vacibliyindən danışılır.

Birincisi, Naxçıvanda keçirilən hərbi təlimlər Ermənistana xəbərdarlıq mesajıdır. Müharibə başlayarsa, Türkiyə Azərbaycana dəstək verəcəyi, ən azı Naxçıvanı qoruyacağı aşkardır. Əgər Ermənistan Rusiyadan daima hərbi dəstək istəyirsə, Azərbaycan da Türkiyədən eyni dəstəyi istəyəcək".



Politoloq hesab edir ki, Naxçıvandakı birgə hərbi təlimlər Türkiyənin Naxçıvanda hərbi baza formalaşdırması prosesini sürətləndirə bilər. Hətta belə fikirlər səslənir ki, hər hansı birgə hərbi təlimlərdən sonra Türkiyənin hərbi hərbi hissəsi Naxçıvanı tərk etməsin, orada yerləşsin.

"Üçüncüsü, Naxçıvandakı hərbi təlimlər Rusiyanı narahat etmir. Bu mövzuda rusiyalı rəsmilərin dilindən hər hansı açıqlama səsləndirilməyib. Bu da Ermənistanda narazılıq yaradır. Rusiya NATO-nun Gürcüstandakı təlimlərini tənqid edir. Ancaq Rusiya NATO dövləti olan Türkiyənin Azərbaycanla birgə hərbi təlimlərinə etiraz etmir. Çünki, Rusiyanın özü Türkiyə ilə əməkdaşlıq edir, qardaş ölkəyə müasir raketlər satır. Ona görə də Kreml Türkiyə-Azərbaycan birgə hərbi təlimlərinə qarşı etiraz etmək istəmir. Bunun özü də Azərbaycanın xeyrinədir.

Dördüncüsü, Naxçıvandakı hərbi təlimlərin psixoloji tərəfi də var. Davamlı hərbi təlimlər orduda torpaqları azad etmək ruhunu artırır. Yəni torpaqları güc yoluyla geri qaytarılmasına qərar verilməsə belə, hərbi təlimlər yoluyla artan ruh yüksəkliyi alternativ yollara baş vurma istəyini artırır".

AzVision.az


Teqlər: Təlim   Hərbi   Naxçıvan