“Binə” və “Sədərək”də vergidən yayınmanın qarşısı alınacaq

  12 İyun 2019    Oxunub : 718
 “Binə” və “Sədərək”də vergidən yayınmanın qarşısı alınacaq
"Binə" və "Sədərək" kimi ticarət mərkəzlərində faktiki sahibkarların vergidən yayınma hallarının aradan qaldırılması üçün tədbirlər görülür.
Azvision.az xəbər verir ki, bunu jurnalistlərə açıqlamasında Vergilər Nazirliyinin İqtisadi təhlil və ekspertiza Deprtamentinin baş direktoru Natiq Şirinov bildirib.

Onun sözlərinə görə, əvvəllər malların bazarlarda faktiki sahibkarlar tərəfindən sənədsiz satılması həyata keçirilirdi və bu, dövriyyələrin şəffaflaşmasına ciddi əngəllər yaradırdı.

"Prezident İlham Əliyev bununla bağlı müvafiq sərəncam imzalayıb ki, idxal-ixrac sahəsində şəffaflaşma təmin olunsun. Öz növbəsində Vergilər Nazirliyi, Dövlət Gömrük Komitəsi, Maliyyə və İqtisadiyyat Nazirlikləri tərəfindən müvafiq addımlar atılıb".

Nazirlik rəsmisi qeyd edib ki, hazırda karqo şirkətləri sırf daşımaçılıqla məşğuldur. Ölkəyə idxal olunan mal və məhsullar faktiki sahibkarın adına rəsmiləşdirilir. Bu da imkan verir ki, ölkə boyu dəyər zəncirinin qorunmasında olan əngəllər aradan qaldırılsın.

"Mallar karqo şirkətləri tərəfindən daşınır. Onlar daşımaçılıqdan öz mənfəətini əldə edirlər. Həmin mallar faktiki sahibkarların adına rəsmiləşdirildiyi üçün növbəti mərhələlərdə dövriyyələrin şəffaflaşması aparılır".

Aytən Zəhra
Azvision.az

Teqlər: Vergilər-Nazirliyi