DİM: 3128 nəfər 600-dən çox bal yığıb

  21 İyun 2019    Oxunub : 1132
 DİM: 3128 nəfər 600-dən çox bal yığıb
2018-2019-cu tədris ilində respublikanın ali təhsil müəssisələrinin bakalavriat səviyyəsinə I-IV ixtisas qrupları üzrə keçirilən qəbul imtahanlarımda 72260 abituriyent iştirak edib. Onlardan 3128 nəfəri 600 baldan yuxarı nəticə göstərib.
Azvision.az xəbər verir ki, bu barədə Dövlət İmtahan Mərkəzinin (DİM) nəşr etdiyi “Abituriyent” jurnalının 12-ci nömrəsində qeyd edilib. Bildirilib ki, yüksək nəticə göstərənlər respublikanın demək olar ki, bütün şəhər və rayonlarını, o cümlədən bəzi kənd məktəblərini təmsil edir.

"Yüksək nəticə göstərənlər I qrupda 880, II qrupda 554, III qrupda 951, IV qrupda isə 743 nəfərdir. 29 nəfəri maksimal nəticə göstərib (700 bal). Son illərdə ən aşağı müsabiqə vəziyyəti xüsusi qabiliyyət tələb edən ixtisaslar üzrə olub. Dövlət İmtahan Mərkəzi bunları nəzərə alaraq gənclərin bu ixtisaslara meyil və marağını artırmaq, onların qəbuluna hazırlığına kömək məqsədilə əvvəlki illərdə olduğu kimi, bu il də xüsusi qabiliyyət tələb edən ixtisaslara dair metodik materiallar hazırlanıb və müxtəlif maarifləndirici tədbirlər həyata keçirilib. Bundan əlavə, 2015-ci ildən xüsusi qabiliyyət tələb edən ixtisaslar üzrə (I qrup-memarlıq ixtisası istisna olmaqla) ayrıca bir qrup - V qrup yaradılıb, qəbul imtahanın struktur və məzmun tərkibi dəyişdirilib. Nəticədə ötən illərlə müqayisədə müsabiqə vəziyyəti dəfələrlə artıb və V qrupa daxil olan ixtisaslara ayrılan 3307 plan yerinə 3593 abituriyent iddia edib".

Qeyd edilib ki, 2015-ci ildə 2355 plan yerinə 4293, 2016-ci ildə 2854 plan yerinə 3993 , 2017-ci ildə 3067 plan yerinə 3939 abituriyent iddia edib.

Aytən Zəhra
Azvision.az



Teqlər: DİM   İmtahan