Girovların məktublarını niyə gətirmirlər? - Dilqəm və Şahbazın ailəsi narahatdır

  02 İyul 2019    Oxunub : 3089
 Girovların məktublarını niyə gətirmirlər? - Dilqəm və Şahbazın ailəsi narahatdır
Xəbər verdiyimiz kimi, Beynəlxalq Qızıl Xaç Komitəsinin (BQXK) nümayəndələri Dağlıq Qarabağ münaqişəsi nəticəsində saxlanılan şəxslərə baş çəkiblər. Növbəti başçəkmə iyun ayında olub.
BQXK əməkdaşları Kəlbəcər girovları Dilqəm Əsgərov və Şahbaz Quliyevlə görüşsələr də, onlardan ailələrinə məktub gətirilməyib.

Girov D.Əsgərovun oğlu Kürdoğlu Əsgərov Azvision.az -a açıqlamasında atasından 1il 8 aydır xəbərsiz olduğunu bildirib.

“Bir il 8 aydır ki, atamdan heç bir xəbər yoxdur. Beynəlxalq Qızıl Xaç Komitəsinin nümayəndələri sonuncu dəfə atamgilə iyun ayının əvvəlində baş çəkiblər”.

Onun sözlərinə görə, məktubla yanaşı, artıq iki ilə yaxındır ki, girovların videogörüntüləri də ailələrinə təqdim olunmur.

“Beynəlxalq Qızıl Xaç Komitəsinin nümayəndələri nə məktub, nə də videogörüntü gətirirlər. Yalnız şifahi məlumat verməklə kifayətlənirlər. Biz atamın vəziyyətinin necə olduğunu bilmirik. Halbuki, Azərbaycanda saxlanılan erməni diversantların ailələrinə hər ay məktub və videogörüntü aparılıb. Bəs bizim girovların məktublarını niyə gətirmirlər?”, - deyə K. Əsgərov vurğulayıb.

Digər girov Şahbaz Quliyevin qardaşı İlham Quliyev isə 4 aydır onlara məktub gətirilmədiyini qeyd edib: "Qardaşımın səhhətində problemlər var idi. 4 aydır məktub ala bilmirik. Dəqiq bilmirik, vəziyyəti necədir. Çox narahatıq".

Xatırladaq ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D. Əsgərov və Ş. Quliyev üzərində qanunsuz “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.

Şahanə Rəhimli
Azvision.az

Teqlər: Girov   Dilqəm-Əsgərov   Şahbaz-Quliyev   Kəlbəcər