Lavrovdan Qarabağ açıqlaması: "Dialoq hələlik bərpa olunmayıb"

      Lavrovdan Qarabağ açıqlaması:    "Dialoq hələlik bərpa olunmayıb"
  02 Oktyabr 2019    Oxunub:1722
Son vaxtlar qoşunların təmas xəttində vəziyyət sakitdir, insidentlər azdır. Həlak olanların meyitləri dəyişdirilib. Saxlanılan şəxslərin dəyişdirilməsinə hazırlıq görülür.
Azvision.az AzərTAc-a istinadən xəbər verir ki, Rusiyanın Xarici İşlər naziri Sergey Lavrov bunu “Valday” Beynəlxalq Diskussiya Klubunun XVI illik iclasında Dağlıq Qarabağ prosesinin nizamlanması haqqında sualı cavablandırarkən bəyan edib.

Nazir deyib: “ATƏT-in Minsk qrupunun həmsədrləri sıx dostluq şəraitində çalışırlar. Onlar bu il üç dəfə xarici işlər nazirləri ilə görüşüblər, o cümlədən bu ilin aprelində mənim iştirakımla Azərbaycanın və Ermənistanın xarici işlər nazirləri ilə görüş keçirilib. İndi vəziyyət bir il əvvəlkindən sakitdir. Lakin siyasi proses yavaşıyıb və hələlik bu ləngiməni aradan qaldıra bilmirik. Tərəflər yetərincə ciddi bəyanatlar, o cümlədən Qarabağın Ermənistan olması barədə bəyanatlar verirlər. Şübhəsiz ki, belə bəyanatlar siyasi prosesin tənzimlənməsinə kömək etmir”.

Rusiya XİN-in ATƏT-in Minsk qrupunun həmsədrləri ilə birgə işlədiyini vurğulayan S.Lavrov deyib: “Bu, az sayda hallardan biridir ki, bizim məsələyə baxışımız tamamilə eynidir, bizim baza sənədlərimiz var. Bizim dəfələrlə müzakirə olunmuş baza prinsiplərimiz var. Bu prinsiplər əsasında məsələnin həllini axtaracağıq. Amma məsələnin həlli birbaşa dialoq yolu ilə tapılmalıdır. Əlaqələr var, lakin nizamlanmaya dair dialoq hələlik bərpa olunmur. Mən burada döyüş əməliyyatlarının yenidən başlanması üçün aşkar təhlükə görmürəm. Biz bunun baş verməməsi üçün hər şeyi edəcəyik”.

Azvision.az



Teqlər: Rusiya   XİN   Lavrov   Qarabağ  





Xəbər lenti