“ASAN Könüllüləri” Təşkilatı yeni proqrama start verib

  15 Oktyabr 2019    Oxunub : 1340
“ASAN Könüllüləri” Təşkilatı yeni proqrama start verib
Oktyabrın 15-də “ASAN Könüllüləri” Təşkilatı və “Coca-Cola” Fondunun birgə təşkilatçılığı ilə “ASAN İnkişaf Modeli- Qadınlar üçün AIM – W” (ASAN Improvement Model for Women) layihəsinin açılış mərasimi olub.
Azvision.az xəbər verir ki, qadınların işgüzar inkişaf platforması olan “AIM – W” layihəsinin məqsədi ölkəmizdə qadınların məşğulluq potensialının gücləndirilməsinə, o cümlədən regionlarda yaşayan qadın və qızların məşğulluğunun təmin edilməsinə və onların sahibkarlıq bacarıqlarının yüksəldilməsinə dəstək göstərməkdir.

Azərbaycanda turizm sahəsində mövcud olan geniş imkanları nəzərə alaraq, “AIM-W” 2019-2020-ci illər üzrə fəaliyyətini “Turizmdə qadınlar” mövzusu üzrə icra edəcək. Layihə Gəncə, Qəbələ, Quba, Mingəçevir, Sumqayıt və Şəkini əhatə edəcək. Layihə çərçivəsində həmin ərazilərdə yaşayan qadın və qızlar üçün turizm sahəsində sahibkarlıq imkanları və karyera üzrə təlimlər keçiriləcək. Təlimdən sonra da təlimçilər iştirakçılara mentorluq edəcək, onların ideyalarına dəstək olacaqlar.

Layihədə təlimçi qismində yerli mütəxəssislərlə yanaşı, beynəlxalq təlimçilər İşıl Keskin Şahan və Soner Şahan da iştirak edəcəklər.



Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin şöbə müdiri Orxan Dəmirli regionlarda layihənin başlamasını səbrsizliklə gözləyən qadınların olduğunu və müraciət edənlərin aktivliyinin müşahidə edildiyini diqqətə çatdırıb: “ASAN Könüllüləri” olaraq daim vətəndaşlara yeni imkanlar yaradılması üçün çalışırıq. “AIM-W” da növbəti imkanlardan biridir və inanırıq ki, layihə iştirak edən hər bir qadın üçün yararlı olacaq. Tezliklə regionlarımıza səfər edəndə məhz qadın sahibkarların yaratdığı turizm fəaliyyətlərindən yararlanacağımızı düşünürəm”.

Açılış mərasimində iştirak edən “Coca-Cola” şirkətinin Qafqaz regionu üzrə ictimaiyyətlə əlaqələr və kommunikasiya meneceri Elşad Fərzəliyev bildirib ki, layihənin əsas üstünlüyü təlimlərdən sonra da qadınlara dəstək göstərilməsidir: “Coca-Cola şirkəti fəaliyyət göstərdiyi 200-dən çox ölkədə cəmiyyətin sosial rifahı üçün müxtəlif təşəbbüslərə və layihələrə dəstək olur. Dəstəklədiyimiz önəmli prioritetlərdən biri isə qadınların inkişafıdır. “ASAN Könüllüləri” ilə birgə tərəfdaşlığımız nəticəsində həyata keçirdiyimiz bu layihə region qadınlarının peşəkar inkişafı və onların turizm sahəsində sahibkarlıq fəaliyyətinə cəlb olunmasına xidmət edir. Azərbaycanın geniş turizm potensialını nəzərə alaraq qadınların məhz bu istiqamətdə yeni imkanlar əldə edəcəklərinə inanırıq. Həmin layihə həm qadınların inkişafına, həm də regionlarımızda turizm sahəsinə töhfədir”.



“ASAN Könüllüləri” Təşkilatının sədri Səbinə Cabarova, Dövlət Turizm Agentliyinin sektor müdiri Hüseyn Həsənov, beynəlxalq ekspert Işın Keskin Şahan da layihənin əhəmiyyətini və qadınların inkişafına mühüm töhfə verəcəyini vurğulayıblar.

Layihə çərçivəsində ilk təlim oktyabrın 16-dan 21-dək Mingəçevir “ASAN xidmət” mərkəzində keçiriləcək.

Xatırladaq ki, 2017-ci ildən etibarən “ASAN Könüllüləri” və “Coca-Cola” Fondu tərəfdaşları ilə birlikdə Gəncə, MasallıQəbələdə yaşayan qadınların sahibkarlıq bacarıqlarının artırılması üçün “Uğurlu qadın uğurlu gələcək layihəsi” icra edib. Layihə çərçivəsində həmin ərazilərdə yaşayan 312 qadın və qız turizm sahibkarlığı mövzusunda təlimlərə qoşulublar.







Azvision.az

Teqlər: ASAN   Könüllü   Təşkilat