Azərbaycan-ABŞ əməkdaşlığı Vaşinqtonda müzakirə olundu
Görüşdə kənd təsərrüfatı sahəsində əməkdaşlıq imkanları geniş müzakirə olunub. Tərəflər Oklahomada keçiriləcək forumun təcrübələri bölüşmək, aqrar sektorda tərəfdaşlıq və investisiya imkanlarını araşdırmaq üçün mühüm platforma olduğu qənaətini bölüşüblər. Nümayəndə heyəti Vaşinqtona işgüzar səfər çərçivəsində Amerika Birləşmiş Ştatları Prezidentinin İcra Aparatının kənd təsərrüfatı üzrə müşaviri Qreqq Daud, ABŞ Beynəlxalq İnkişaf Agentliyinin rəsmisi Brok Bierman, ABŞ-Azərbaycan iqtisadi tərəfdaşlıq komissiyasının həmsədri Piter Xaas ilə də görüşüb. Görüşlərdə Azərbaycan-ABŞ əməkdaşlığı, ölkə iqtisadiyyatında, o cümlədən qeyri-neft sektorunda inkişaf tendensiyaları, əldə olunan nailiyyətlər müzakirə olunub. Görüş iştirakçıları iki ölkə arasında aqrar sahədə tərəfdaşlığın ikitərəfli münasibətlərdə inkişaf etdirilməli vacib istiqamətlərdən biri olduğunu bildirib, bu cür dialoqların əməkdaşlığı daha da genişləndirmək üçün gözəl imkanlar yaratdığını qeyd ediblər.
Nümayəndə heyəti Vaşinqtonda görüşləri başa vurduqdan sonra Oklahoma-Azərbaycan Kənd Təsərrüfatı Forumunda iştirak etmək üçün bu ştata yola düşəcək. Qeyd edək ki, bu, 2019-cu ildə ABŞ və Azərbaycanın kənd təsərrüfatı istehsalçılarını bir araya gətirən sayca ikinci forumdur. Aprel ayında Çikaqoda keçirilən foruma İllinoys ştatının 33 şirkəti və Azərbaycanın 14 şirkəti qatılıb. Oklahoma-Azərbaycan Kənd Təsərrüfatı Forumunda heyvandarlığın inkişafı, orta və iri fermer təsərrüfatlarının idarə olunması, dənli və dənli-paxlalı bitkilərin müasir üsullarla becərilməsi məsələləri müzakirə olunacaq.
Forum Oklahoma Kənd Təsərrüfatı, Qida və Meşə Təsərrüfatı Departamenti, Azərbaycan Kənd Təsərrüfatı Nazirliyi, ABŞ-ın Azərbaycandakı səfirliyi, Azərbaycanın Birləşmiş Ştatlardakı səfirliyi və Amerikanın Azərbaycandakı Ticarət Palatası ilə tərəfdaşlıq çərçivəsində Birləşmiş Ştatlar-Azərbaycan Ticarət Palatası (USACC), Oklahoma Ticarət Departamenti və ABŞ-ın Beynəlxalq İnkişaf Agentliyinin (USAID) Azərbaycandakı missiyası ilə birgə təşkil olunub.
Azvision.az
Teqlər: ABŞ Vaşinqton Kənd-Təsərrüfatı