Azərbaycanda dərman təhlükəsizliyi həftəsi elan edilib

  25 Noyabr 2019    Oxunub : 866
Azərbaycanda dərman təhlükəsizliyi həftəsi elan edilib
Ümumdünya Səhiyyə Təşkilatının Uppsala Monitorinq Mərkəzi (Uppsala Monitoring Centre) tərəfindən 2019-cu ilin 25-29 noyabr tarixləri #MedSafetyWeek yəni “Dərman təhlükəsizliyi həftəsi” elan edilib.
Səhiyyə Nazirliyi Mətbuat Xidmətindən Azvision.az -a verilən məlumata görə, dərman vasitələri üzrə tənzimləyici orqanlar, “dərman vasitələrinin əlavə təsirləri və onların bildirilməsi” mövzusunda beynəlxalq səviyyədə keçirilən maarifləndirici sosial media kampaniyasında iştirak edəcəklər. Bu il keçirilən kampaniya eyni zamanda bir çox dərman vasitələrinin düzgün istifadə edilməsi ilə əlaqədardır və əsas məqsədlərindən biri əlavə təsirlərin bildirilməsinin bir neçə növ dərman qəbul edən pasiyentlərin bu xüsusda təhlükəsizliyinin təmin olunmasında vacib faktor olduğunu ictimaiyyətə mesaj verməkdir.

Azərbaycan Respublikası Səhiyyə Nazirliyi Analitik Ekspertiza Mərkəzi bu il keçirilən sosial media kampaniyasında iştirak edəcək və Bildiriş Kartı vasitəsi ilə əlavə təsirlərin bildirilməsinin əhəmiyyətini dəstəkləyəcəkdir. Dərman təhlükəsizliyi həftəsi dünyanın 57 ölkəsində dərman vasitələrinə nəzarət edən səlahiyyətli orqanların birgə təşəbbüsüdür.

Polifarmasiya - eyni vaxtda dörd və ya daha çox reseptli, reseptsiz və ya ənənəvi dərman vasitəsinin istifadə olunmasını nəzərdə tutur. Dərman vasitələri ilə qidalar və ya bitki mənşəli məhsullar arasında olan qarşılıqlı təsirlərdən artan risklər səbəbindən polifarma pasiyentlərdə əlavə təsirlərin yaranma ehtimalını artırır. Yaşlı insanlarda polifarmasiya çox geniş şəkildə müşahidə edilsə də, eyni zamanda müntəzəm olaraq bir çox dərman vasitələrindən istifadə edən hər kəs əlavə təsirlərə məruz qala bilər. Bura uzun müddət davam edən xroniki xəstəliyi olan, mütəmadi olaraq çox sayda dərman vasitəsi qəbul edən pasiyentlər daxildir.

Tədqiqatlar göstərir ki, 75 yaşdan yuxarı insanların üçdə biri ən az altı dərman qəbul edir, bir milyondan çox insan gündə səkkiz və ya daha çox dərman qəbul edir. Bu səbəbdən keçirilən MedSafetyWeek-də şübhəli əlavə təsirləri Bildiriş Kartları vasitəsi ilə bildirərək dərman təhlükəsizliyinə dəstək olmaq hər birimizin borcudur.


Azvision.az

Teqlər: Dərman