Ədliyyə Nazirliyində 20 Yanvar şəhidləri anılıb

  16 Yanvar 2020    Oxunub : 2037
Ədliyyə Nazirliyində 20 Yanvar şəhidləri anılıb
Ədliyyə Nazirliyində 20 Yanvar faciəsinin 30-cu ildönümünə həsr olunmuş anma mərasimi keçirilib.
Ədliyyə Nazirliyi Mətbuat xidmətindən Azvision.az -a verilən məlumata görə, tədbirdə Ədliyyə naziri Fikrət Məmmədov, nazir müavinləri və nazirliyin kollektivi, həmçinin gənc ədliyyə işçiləri və könüllülər, vətəndaş cəmiyyəti nümayəndələri iştirak ediblər.

Anma mərasimində mərkəzi hakimiyyətin beynəlxalq hüquq normalarını və ölkə qanunlarını büsbütün tapdalamaqla o müdhiş gecədə sovet qoşununun iştirakı ilə həyata keçirdiyi hərbi təcavüz nəticəsində dinc əhaliyə divan tutulduğu, yüzlərlə insanın qətlə yetirildiyi bildirilib, xalqımızın azadlığı və dövlətimizin müstəqilliyi yolunda canlarını fəda etmiş şəhidlərimizin xatirəsi bir dəqiqəlik sükutla yad edilib.

Vurğulanıb ki, qətliamın ertəsi günü ümummilli lider Heydər Əliyev ölkəmizin Moskvadakı nümayəndəliyinə İlham Əliyevlə gələrək bu kütləvi qırğınla bağlı kəskin bəyanatla çıxış edib və yalnız bir neçə il sonra Ulu Öndərin təşəbbüsü ilə faciəyə ilk dəfə dövlət səviyyəsində siyasi-hüquqi qiymət verilib. Ölkə Prezidenti cənab İlham Əliyev tərəfindən bu tarixi gün barədə əsl həqiqətlərin beynəlxalq ictimaiyyətə geniş çatdırılması, şəhidlərimizin xatirəsinin əbədiləşdirilməsi, onların ailələrinin və əlillərin sosial müdafiəsinin gücləndirilməsi üzrə məqsədyönlü addımlar atılır. Azərbaycanın Birinci-vitse prezidenti Mehriban Əliyeva və rəhbəri olduğu Heydər Əliyev Fondu tərəfindən bu sahədə mühüm işlər həyata keçirilir.

Mərasimdə Qanlı Yanvar faciəsinə həsr olunmuş film nümayiş etdirilib, həmin hadisələr üzrə respublika istintaq qrupunun üzvü olmuş nazirliyin İstintaq idarəsinin rəisi Nazim Abbasov və qanlı hadisələrin şahidləri, ədliyyə naziri yanında İctimai Komitənin üzvləri, vətəndaş cəmiyyəti təmsilçiləri Səadət Bənənyarlı, Əliməmməd Nuriyev və Əhməd Abbasbəyli faciə ilə bağlı xatirələrini ədliyyə işçiləri ilə bölüşüblər.

Çıxışlarda qırğın zamanı xalqımızın haqq-ədalətinin bərqərar edilməsi uğrunda küçələrə çıxmış neçə-neçə insanların yaralanması və qəddarcasına qətlə yetirilməsi barədə konkret faktlar səsləndirilib, bu qanlı aksiya zamanı insan hüquqlarına dair çoxsaylı beynəlxalq sənədlərin, o cümlədən Ümumdünya İnsan hüquqları Bəyannaməsinin tələblərinin kobud şəkildə pozulduğu, hadisələrlə bağlı sonralar başlanmış cinayət işinin istintaqı aparılarkən qaranlıq qalan bir çox məqamlara aydınlıq gətirildiyi, dinc əhaliyə qarşı əli silahlı ordudan istifadə etməklə hərbi cinayət törədilməsinin tam sübuta yetirildiyi diqqətə çatdırılıb.

Azvision.az

Teqlər: Ədliyyə-Nazirliyi   20-Yanvar   Mərasim