Şamaxı Rəsədxanasının direktoru: “Məni və ailəmi ölümlə hədələyirdilər”

  28 Fevral 2020    Oxunub : 3889
 Şamaxı Rəsədxanasının direktoru: “Məni və ailəmi ölümlə hədələyirdilər”
Bu gün Şamaxı Astrofizika Rəsədxanasında "İqor Kosyagin və Sergey Mironov" adı altında yayılan məlumatlarla bağlı mətbuat konfransı keçirilib.

Azvision.az -ın məlumatına görə, N.Tusi adına Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov bildirib ki, qondarma “şəxslər” tərəfindən Rəsədxana haqqında həqiqəti əks etdirməyən informasiyalar yayılıb:
"Son illərdə nail olduğumuz beynəlxalq elmi əməkdaşlıq imkanlarından yararlanaraq rəsədxanada aparılan elmi tədqiqat işlərini keyfiyyətcə daha yüksək mərhələyə qaldırmaq üçün çalışdığımız bir vaxtda, bu cür əsassız və şər dolu ittihamlarla üz-üzə qalmağımız çox məyusedici haldır. Saxta, qondarma İqor Kosyagin və Sergey Mironov adları altında naməlum şəxslər və ya şəxs, 15 sentayabr 2016-cı ildə ŞAR-ın direktoru tərəfindən Elmi Şuranın qəbul etdiyi qərar əsasında imzalanmış 188 saylı Əmrə istinad edərək öz qüsurlu şərhi ilə Azərbaycan, rus və ingilis dillərində özünün qeyd etdiyi kimi 2000-dən artıq ünvana, o cümlədən ŞAR-ın beynəlxalq səviyyədə elmi tərəfdaşlıq etdiyi institutlar və alimlərin elektron poçt ünvanlarına, xarici ölkə səfirliklərinə müraciət ünvanlayıb. İqor Kosyagin və Sergey Mironov aysberqin görünən hissəsidir, əslində bu əsassız ittihamlar ilk dəfə ŞAR-ın ünvanına onun keçmiş əməkdaşı Yanoş Məhərrəmov tərəfindən mediada ictimailəşdirilib. Bu faktlar artıq bir institutun imicinin zədələnməsi olmayıb, bilərəkdən saxta məlumatlar yaymaqla Respublika elminin aşağılanması, ölkənin elm siyasətinə, eləcə də bütünlüklə ölkənin imicinə vurulan ağır zərbədir".



N.Cəlilov qeyd edib ki, məhkəmə proseslərinə görə özü və ailəsi ölümlə hədələnib: "Bir ay ərzində ailəm evdən çölə çıxa bilmədi. Bu müddətdə qardaşımın bağında yaşamışıq. Ailəmi ölümlə, məhvetməklə hədələyirdilər. Mənə deyirdilər ki, Yanoşu təcili işə götürməlisən və ona doktorluq diplomu verməlisən. Onun böhtanları 30-dan çox saytlarda yayımlanıb. Gecə saatlarında bura qadınlar gətirirdilər. Müəyyən çəkilişlər aparıb, bunu da mənim adımla əlaqələndiriblər".

Aytən Zəhra
Azvision.az

Teqlər: Rəsədxana   AMEA   Şamaxı