Azərbaycanda məhkəmə prosesləri onlayn keçirilir

  30 Aprel 2020    Oxunub : 1867
 Azərbaycanda məhkəmə prosesləri onlayn keçirilir
Əhalinin sağlamlığının və təhlükəsizliyinin qorunması məqsədilə Prezident İlham Əliyevin rəhbərliyi ilə COVID-19 infeksiyasının yayılmasının qarşısının alınması ilə bağlı qəti tədbirlər görülür. Bu məqsədlə Nazirlər Kabineti yanında Operativ Qərargah tərəfindən sosial izolyasiya qaydaları və xüsusi karantin rejimi tətbiq olunub, fəaliyyət məhdudlaşdırılıb.
Ədliyyə Nazirliyinin mətbuat xidmətindən Azvision.az a verilən məlumata görə, bu tədbirlər çərçivəsində, həmçinin mülki işlər və kommersiya mübahisələri üzrə məhkəmə icraatının “Elektron məhkəmə” informasiya sistemi vasitəsilə aparılması imkanı yaradılıb.

Bununla əlaqədar dövlətimizin başçısının məhkəmə-hüquq islahatlarının dərinləşdirilməsinə dair 2019-cu il 3 aprel tarixli Fərmanının icrası çərçivəsində “Elektron məhkəmə” informasiya sisteminin funksionallığının artırılması üzrə tədbirlər davam etdirilərək, Ədliyyə Nazirliyi tərəfindən Mülki-Prosessual Məcəllənin tələbləri nəzərə alınmaqla və qabaqcıl beynəlxalq təcrübə öyrənilməklə xüsusi proqram modulu işlənib hazırlanıb.

“Elektron məhkəmə” informasiya sistemində yaradılmış yeni proqram məhsulu vasitəsilə məhkəmə proseslərinin onlayn rejimində videokonfrans formasında həyata keçirilməsi, həmçinin iclasın avtomatlaşdırılmış rejimdə audio və videoyazılışının aparılması mümkündür.

Bu innovasiyanın tətbiqi ilə tərəflərə çox sadə üsulla, hətta “Şəxsi elektron kabinet” yaratmadan kompüter və ya mobil telefon vasitəsilə videoiclasa qoşulmaqla məhkəmə baxışında iştirak etmək imkanı yaradılıb. İştirakçılar əvvəlcədən təyin olunmuş vaxtda prosesə məhkəmə tərəfindən elektron qaydada göndərilmiş elektron keçid üzərindən qoşula bilirlər. İndiki pandemiya şəraitində vətəndaşların təhlükəsizliyinin qorunması və onların hüquqlarının məhkəmə müdafiəsinin təmin olunması məqsədilə Bakı şəhəri Yasamal Rayon Məhkəməsində həmin proqram təminatı uğurla tətbiq olunaraq məhkəmə prosesləri videokonfrans şəklində onlayn qaydada keçirilib və yekun qərarlar çıxarılıb.

Vətəndaşların məhkəmələrə müraciət imkanlarının və ədalət mühakiməsinə əlçatanlığın asanlaşdırılması məqsədilə Ədliyyə Nazirliyi tərəfindən məhkəmələrin fəaliyyətində müasir İKT-lərin və innovasiyaların tətbiqinin genişləndirilməsi üzrə tədbirlər davam etdirilir.

Azvision.az

Teqlər: Məhkəmə   Ədliyyə-Nazirliyi