“Kimisə aldatmaq olar, amma koronavirus hiylə tanımır”

  27 İyun 2020    Oxunub : 3251
“Kimisə aldatmaq olar, amma koronavirus hiylə tanımır”
Koronavirusa qarşı mübarizə bu gün bütün bəşəriyyətin gündəliyində duran bir nömrəli məsələdir. Artıq hamı razılaşır ki, bu problemin həll edilməməsi sivilizasiyanın bütün nailiyyətlərini ciddi təhlükə altına almış olur.
Azvision.az xəbər verir ki, bunu Milli Məclisin deputatı Aydın Mirzəzadə deyib. Deputat bildirib ki, problemə qarşı Azərbaycanda da ciddi mübarizə aparılır.

"Məhdudlaşdırıcı tədbirlər sisteminin tətbiqi, xəstələrin müalicəyə alınması problemin bütün cəmiyyətə yayılmasının qarşısını alır. Bununla belə hələ də gündəlik xəstəliyə yoluxanların sayı çox yüksəkdir, karantinə alınan bölgələrin sayı durmadan artır. Bunun səbəblərinin araşdırılması isə məsələnin kökündə heç də hər kəsin karantin rejimi tələblərinə riayət etməməsinin olduğunu göstərir. İcitimai yerlərdə tibbi maska taxılmaması, sosial məsafənin gözlənilməməsi təəsüf ki, çox yayılıb. Hər birimiz hər gün bunun şahidi oluruq.

Son dövrlərdə tibbi maska taxılmamasına görə cərimlərin tətbiqi yenə hər kəsi ictimai yerdə tibbi maska taxmağa məcbur edə bilmir. Müxtəlif bəhanələr gətilir, ən qəribəsi isə bir çoxlarının üzlərinə deyil, çənələrinə maska taxaraq polis görən kimi maskan yuxarı qaldırmalarıdır.

Bununla kimisə aldatmaq olar, amma koronavirus hiylə tanımır və kiçik ehtiyatsızlıq insanın bu ağır xəstəliyə düçar olmasına gətirib çıxarır. Artıq ölkəmizdə 15 mindən çox insan xəstəliyə yoluxub, 200-ə qədər vətəndaşımız bu səbəbdən həyatını itirib. Onların içində tanınmış simalar, o cümlədən hər birimizin yaxın adamları da var.

Çıxış yolu qanunun yerinə yetirilməsinin ciddi nəzarət edilməsi, hətta qanunun sərtləşdirilməsidir. Yüksək cərimə vermək istəməyən 30 qəpiklik tibbi maska ilə həm özünü, həm də büdcəsini qoruya bilər. Koronavirusu həyatımızdan yox eləmək hər birimizin vəzifəsidir", - deyə A.Mirzəzadə vurğulayıb.

Azvision.az

Teqlər: Deputat   Koronavirus