Ermənistan Gəncəni niyə “SKAD”la vurub?

Ermənistan Gəncəni niyə “SKAD”la vurub?
  13 Oktyabr 2020    Oxunub:20097
Xəbər verdiyimiz kimi, oktyabrın 11-də Ermənistan silahlı qüvvələri Gəncə şəhərinə SCUD (Skad-B) raketi ilə hücum edib. Düşmənin terror hücumu nəticəsində 10 nəfər həlak olub, 34 sakin yaralanıb. Dinc sakinlərə qarşı ballistik raketdən istifadə etmək hərbi cinayət olmaqla yanaşı, vandalizm aktıdır. Dünyada “Skad-B” raketiylə mülki əhalinin hədəfə alınması təcrübəsindən demək olar ki, az istifadə edilib. Bu raketdən mülki əhalini vurmaq üçün istifadə etməyə yalnız Ermənistanın faşist xislətli hərbi siyasi rəhbərliyi qərar verə bilərdi.
Azvision.az-ın məlumatına görə, Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) direktoru Qəzənfər Əhmədov bildirib ki, Gəncəyə atılan raketin bir hissəsinin qalıqları Mingəçevirdə dağlıq əraziyə düşüb, ötən gün həmin raketin ən son qalıqları tapılıb.

Q.Əhmədov qeyd edib ki, raketin qalıqlarının üzərində 8K-14 yazılıb: "Bu, bizə dəqiq deməyə imkan verir ki, Gəncəyə atılan “Elbrus” raketi ( “Skad”ın digər adı-red) olub. Onun uzunluğu 11,2 metrdir".



Ermənistanın Gəncədə mülki əhalini hədəf alan hücumu zamanı "Skad" raketindən istifadə etməsi təsadüfi deyil. Rusiya istehsalı olan raketlərin texniki xüsusiyyətlərinə nəzər salsaq, hücumun məqsədli şəkildə həyata keçirildiyini demək olar.

Xatırladaq ki, 1961-1987-ci illərdə istehsal edilən “Skad” raketlərinin hədəfdən yayınma dairəsi təxminən 450 metrdir. Sonuncu buraxılışı 1987-ci ildə istifadəyə verilən raketlər köhnə olduğundan dəqiq zərbə qabiliyyətini itirib.

Ekspertlərin fikrincə, məhz bu səbəbdən “Skad”lardan hərbi hədəflərin vurulması üçün nadir hallarda istifadə olunub.



Təcrübə göstərir ki, “Skad” raketləri yaşayış məntəqələrinə düşən zaman daha çox dağıntılar törədir və mülki şəxslər arasında çoxsaylı ölümlə nəticələnir. İşğalçı ordu bütün bunları nəzərə alaraq, Gəncə şəhərini “Skad”la vurmaqla terrorçu planını həyata keçirməyə çalışıb.



Artıq faktlar da təsdiqləyir ki, Ermənistan faşist mahiyyətini ortaya qoyaraq “Skad” raketlərini bilərəkdən seçib və hərbi əməliyyatlarda nadir hallarda istifadə olunan dağıdıcı silahla mülki əhalini hədəf alıb.

Bundan əvvəl də Ermənistan ordusu öz ərazisindəki buraxılış nöqtələrindən Azərbaycana qarşı “Toçka-U”, operativ-taktiki raket kompleksləri və 300 km məsafəyə malik “Skad-B” qısa mənzilli ballistik raketindən istifadə edib.



Hərbi ekspert Rəşad Süleymanov Azvision.az-a bildirib ki, "Skad-B" digər adı “Elbrus” olan ballistik raket sovetlər birliyinin yaratdığı raketlərdəndir. Onun sözlərinə görə, adıçəkilən raketlərin hədəfi vurmaq dəqiqliyi çox azdır.

"Ermənistan bu raketləri 1995-1996-cı illərdə əldə edib. Məndə olan məlumata görə, 27 ədəd "Skad" raketi əldə olunub. İndi onun 5-6 sistemi mövcuddur. Yerdə qalanları baxımsızlıqdan sıradan çıxıb. Ermənistanın bütün addımları, Azərbaycan Müdafiə Nazirliyinin yayımladığı videolarda da var. Bunlar Azərbaycanın hava hücumundan müdafiə sistemi tərəfindən nəzarətdədir. Bütün ölkə ərazisində olan həm uçuşlar, həm də raket buraxılışları izlənilir, onların koordinatları təyin edilir.



Bütün hallarda görünən odur ki, Ermənistan ordusu həm “Smerç” yaylım atəş sistemlərini, həm də operativ-taktiki raket kompleklərini öz ərazisindən tətbiq edir. O cümlədən "Skad-B" raketləri də Ermənistan ərazisindən atılıb", - deyə hərbi ekspert vurğulayıb.



Anar Kəlbiyev
Azvision.az


Teqlər: Skad-B   Raket   Düşmən   Gəncə   Atəş  





Xəbər lenti