Onun sözlərinə görə, ölkədə sərt karantin rejiminin olmaması, yumşaldılmalar, məktəblərin açılması, rayon və şəhərlərarası gediş-gəlişin bərpa edilməsi yoluxma sayının artmasına təsir göstərir.

“Həmçinin müharibə şəraiti ilə əlaqədar insanların daha çox hərbi hissələrin önünə axın etməsi, könüllülərin orduya yola salınması zamanı qaydalara riayət edilməməsi yoluxma sayına təsir edib. Azərbaycan xalqı vətənpərvərdir və bunsuz da keçinmək olmur, insanların qarşısını almaq olmur. Lakin hadisələrin fonunda artıq koronavirus son günlərdə aktuallığını itirib. Nəticədə insanlar xəstəliyə yoluxma halına artıq adi yanaşır”.

V.Əliyev qeyd edib ki, təhlükə sovuşmayıb və qaydalara riayət etmək lazımdır: “Biz insanlara xəbərdarlıq etmək istəyirik ki, artıq bir sıra ölkələrdə təkrarən koronavirusa yoluxma hallarında artım müşahidə olunur. Azərbaycanda son günlərdə 200-ün üzərində yoluxma hallarının olması artıq bir siqnaldır. Vəziyyət daha da pisləşə bilər, yoluxma arta bilər. Yay fəslində olduğu kimi gündəlik 500-600-dən yuxarı yoluxma baş verərsə, onun qarşısını almaqda çətinlik çəkəcəyik. Ona görə qaydalara riayət etmək lazımdır, maska taxılmalı, fiziki məsafə gözlənilməli və gigiyena qaydaları qorunmalıdır”.

Aytən Zəhra
Azvision.az