“Sonuncu dəfə Səddam Hüseyn “Skad” raketlərindən istifadə edib”

  18 Oktyabr 2020    Oxunub : 2146
   “Sonuncu dəfə Səddam Hüseyn “Skad” raketlərindən istifadə edib”
Hərbi əməliyyatlar Azərbaycanın beynəlxalq səviyyədə tanınmış ərazilərində aparılır və BMT TŞ-nin qətnamələrinə əsasən bu ərazilər mübahisəli deyil, işğal olunmuş ərazilərdir.
Azvision.az xəbər verir ki, bu fikirləri Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev Avropanın nüfuzlu “Deutsche Welle” Televiziyasına müsahibəsində səsləndirib.

O, oktyabrın 17-də Ermənistanın Gəncəyə reallaşdırdığı “Skad” raket hücumundan da danışıb və bunun hərbi əməliyyatlar başlayandan bu yana ikinci dəfə baş verdiyini deyib: “Gəncə şəhəri cəbhədən 100 km uzaqlıqda yerləşir. Sonuncu dəfə İraq müharibəsi zamanı Səddam Hüseyn “Skad” raketlərindən istifadə edib. Təəssüf ki, Ermənistan dinc sakinlər arasında daha çox itkiyə səbəb olmaq üçün hücumu gecə saatlarında həyata keçirib. Biz oktyabrın 10-da Moskvada humanitar atəşkəslə bağlı razılığa gəlmişdik. Lakin, təəssüf ki, razılaşmanın səhəri günü Ermənistan ilk dəfə Gəncəyə hücum həyata keçirdi. Təbii ki, biz hərbi səhnədən danışıqlar masasına keçmək istəyərik, lakin Ermənistan tərəfdən bununla bağlı heç bir müsbət addım görmürük. Bunun baş verməsi üçün Ermənistan anlamalıdır ki, bizim torpaqlarda hərbi əməliyyatları dayandırmalıdır”.

Azvision.az

Teqlər: Fərid-Şəfiyev