“Human Rights Watch” təşkilatının mütəxəssisləri də məlumatı təsdiqləyib. Beləliklə, Ermənistan silahlı qüvvələri və işğalçı ölkənin rəhbərliyinin mülki vətəndaşlara qarşı cinayətləri öz təsdiqini tapdı. Bundan sonra Ermənistan tamamilə terrorçu dövlət olaraq törətdiyi cinayətlərə görə Haaqa beynəlxalq müharibə cinayətləri məhkəməsində cavab verməli olacaq.

Hərbi cinayətlər faktının nüfuzlu təşkilatlar tərəfindən tanınması son zamanlar əlləri ciddi şəkildə qana boyanan Ermənistanın xarici imicinə kifayət qədər ciddi zərbədir. Erməni faşistlərinin Gəncəyə hücumunun dəhşətli nəticələri - qadınların, uşaqların, yaşlı insanların öldürülməsi artıq Ermənistanı terrorçu dövlət kimi bütün dünyaya göstərdi, həmçinin beynəlxalq ictimaiyyətin qınağına səbəb oldu.

Xüsusilə, “Human Rights Watch” təşkilatı Ermənistan silahlı qüvvələrinin 28 oktyabrda Bərdə şəhərinə hücum zamanı beynəlxalq səviyyədə istifadəsi qadağan olunmuş kasetli döyüş sursatları və ən azı bir uzun mənzilli raket növündən istifadə etdiyini açıqlayıb. Hücum nəticəsində 21 nəfər həlak olub, azı 70 nəfər yaralanıb. “Human Rights Watch” beynəlxalq və yerli jurnalistlərin, habelə sakinlərin zərbələrin endirildiyi yerdən çəkdikləri foto və videogörüntüləri təhlil edib.

Həqiqət budur ki, həm “Amnesty International”, həm də “Human Rights Watch” uzun müddət anti-Azərbaycan siyasəti aparan təşkilatlar kimi tanınır. Adları çəkilən təşkilatlar səbəb oldu-olmadı, hər hansı inandırıcı sübut və ya fakt göstərilmədən ardıcıl olaraq Azərbaycanı tənqid ediblər.

“Amnesty International” və “Human Rights Watch”un bir çox hesabatlarını tam olaraq “ermənipərəst” adlandırmaq olar. Bu qurumlar demək olar ki, heç vaxt Azərbaycanın tərəfini tutmayıblar və heç vaxt Azərbaycanın mövqeyini müdafiə etməyiblər.

Bəs niyə birdən-birə baxışlarını dəyişdilər?

Görünən budur ki, geosiyasi zəmin dəyişib. BMT qətnamələri və bütün nüfuzlu beynəlxalq təşkilatların sənədlərində Azərbaycanın ədalətli mövqeyi təsdiqlənib. Ölkəmizin öz torpaqlarını işğaldan azad etmək hüququ var və bu, beynəlxalq sənədlərdə də öz əksini tapıb. İrəvan, Ermənistan silahlı qüvvələri isə bir sıra qanlı cinayətlər törədərək, terrorçu xislətini nümayiş etdirdi və bununla müəyyən olunmuş qırmızı xətti keçdilər.

Məlumat üçün bildirək ki, kaset mərmi, adi mərmilərdən fərqlənir və bu, daha geniş məhv radiusuna, çoxsaylı insanın öldürülməsinə səbəb olan dəhşətli, ölümcül bir silahdır.

Dünya Gəncə və Bərdədə günahsız uşaqların,qadınların öldürülməsini gördü. Beynəlxalq ictimaiyyət işğalçının münaqişə bölgəsi və döyüş meydanı ilə heç bir əlaqəsi olmayan şəhərlərdə çox sayda mülki insanı qətlə yetirməsi və qanlı əməllərini unutmayacaq. Erməni terrorizmi kəskin şəkildə pislənilməli və bunu törədənlər ağır cəzalandırılmalıdır.

Azvision.az