“Həmişə qələbə xəbərlərini gözləyirəm və inanıram ki, Ali Baş Komandanın rəhbərliyi ilə hər şey əla olacaq. Göydə Allaha, yerdə ona sığınmışıq. Dövlətimiz, başçımız nə deyirsə, biz də ona hazırıq. Səbr etmək lazımdır, hər şeyi birdən həll etmək mümkün deyil. Kəndlərimiz, rayonlarımız azad edildikcə qəhərlənirəm, sevinc gözyaşları tökürəm. Allah əsgərlərimizi var etsin, Ordumuzu qorusun.

90-cı illərin ağrısını, acısını, dəhşətini gözümlə görmüşəm. 1991-ci ildə Gəncənin girəcəyində ermənilərin bomba qoyub partlatdığı Ağdam -Tiflis avtobusunda övladımla birlikdə mən də olmuşam. Oradan 5-6 nəfər sağ çıxdı. Çox ağır yaralandım, bir ilə yaxın yaddaşımı itirdim. İndi həmin yerdə həlak olanların xatirəsinə abidə də qoyulub. Ermənilərin məqsədi Gəncə avtovağzalını partlatmaq idi.

Xocalı, Quşçular, Malıbəyli camaatı köçkün düşəndə onların bir neçəsini evimdə yerləşdirmişəm, qulluq etmişəm. O dəhşətli günləri unutmaram. Ona görə də Ordumuzun uğurlarına ürəkdən sevinirəm. Xalq sevinc içindədir. İllərdir ki, böyük ümidlə yaşayıram. Arzumdur ki, Ağdam Dövlət Dram Teatrı Ağdam şəhərində yenidən fəaliyyət göstərsin. Ora bizim torpağımzıdır. Biz haqq tərəfdarıyıq. Dünya insanları da bizim tərəfimizdə olmalıdır”.

Aktrisa Şuşanın azad olunması xəbərini xüsusi həyacanla gözləyir.

“Şuşa, Laçın, Kəlbəcər bizim tacımızdır. Şuşa Üzeyir Hacıbəyov, Xan Şuşinski deməkdir. Ağdama qayıdanda ilk olaraq anamın məzarını axtaracağam. Anamı orada itirdim. Heç onu necə tapacağımı bilmirəm. Yoldaşım Tofiq Qarayev 6 il Milli Ordumuzun tərkibində müharibədə döyüşüb. Özüm isə 1989-cu ildən 1998-ci ilə qədər Ağdam Dövlət Dram Teatrının kollketivi ilə birgə qaynar döyüş nöqtələrində olmuşam. Qarabağ, Ağdam deyəndə qəlbim alovlanır. Qarabağ azad olunandan sonra kəndbəkənd oraları gəzib ürəyimə su səpəcəyəm. Həyatımı Ağdamla bağlayacağam. Həmişə Qarabağlı olmağımla fəxr etmişəm”.

Şahanə Rəhimli
Azvision.az