Mariya Stadnik Avropa çempionatının finalına yüksəldi

  21 Aprel 2021    Oxunub : 2546
   Mariya Stadnik Avropa çempionatının finalına yüksəldi
Polşanın paytaxtı Varşavada güləş üzrə Avropa çempionatı davam edir.
Azvision.az xəbər verir ki, çempionatın üçüncü günündə 50 kiloqram çəki dərəcəsində çıxış edən qadın güləşçimiz Mariya Stadnik yarışa qələbə ilə başlayıb.

Millimizin lideri 1,5 illik fasilədən sonra güləş xalçasına inamlı qələbə ilə qayıdıb. Təcrübəli güləşçimiz Rusiya idmançısına heç bir şans tanımayıb və adını yarımfinala yazdırıb. Finala gedən yolda güləşçimizin rəqibi ukraynalı idmançı olub. Rəqibini məğlub edən M.Stadnik Avropa çempionatının finalına yüksəlib. Qızıl medal uğrunda görüşdə idmançımız Bolqarıstan təmsilçisi Miqlena Selişka ilə qarşılaşacaq. Görüş aprelin 22-də təşkil olunacaq.

Bu gün iki sərbəst güləşçimiz bürünc medal uğrunda xalça üzərinə çıxacaq. Belə ki, Əhmədnəbi Qvarzatilov (61 kq) Gürcüstan idmançısı Beka Lomtadze, Osman Nurməhəmmədov (92 kq) isə ukraynalı Andril Vlasov ilə qarşılaşacaq.

Qeyd edək ki, Avropa çempionatında sərbəst güləşçilərimizdən Turan Bayramov (70 kq) gümüş, Əfqan Xaşalov (57 kq) və Əli Rəhimzadə (65 kq) isə bürünc medala sahib olublar.

Azvision.az

Teqlər: MariyaStadnik