“Toylar başlamasa, vəziyyətimiz lap pisləşəcək” - Xalq artisti

  02 İyun 2021    Oxunub :2361
“Toylar başlamasa, vəziyyətimiz lap pisləşəcək” -  Xalq artisti
“Çörəyimiz toylardan çıxır. Bir ildən çoxdur ki, biz müğənnilər maddi və mənəvi baxımdan çətinliklər çəkirik. Gözümüzü dövlətin verdiyi maaşa tikmişik”.

Bunu Azvision.az -a Xalq artisti Gülyanaq Məmmədova pandemiyanın sənət adamlarına vurduğu maddi zərərdən danışarkən deyib.
Tanınmış müğənni Operativ Qərargahı toyların keçirilməsinə icazə verməyə çağırıb:

“Biz müğənnilər istər COVID-19 pasportlu, istərsə də pasportsuz toyların bərpa olunmasını istəyirik. Əgər vaksin vurdurmaq könüllüdürsə, onda niyə vurdurmayanlar toya gedə bilməz? Bəs deyirlər könüllüdür, onda niyə məcburi edirlər? Qərargahın fikirlərinə qarşı gəlmirəm. Onlar nəsə edirlərsə, bizim sağlamlığımız üçün edirlər. Ancaq deyilənlə edilən üst-üstə düşmür. Məsələn, problemim var, mən vaksini necə vurdura bilərəm? Belə çıxır ki, peyvənd vurdurmasam toya gedə bilmərəm.

Mən koronavirusa yoluxanda 10 gün ərzində sağaldım. Ancaq indiyə kimi xəstəliyin stressini keçirirəm. Bu, mənə elə bir qorxu verib ki, xofundan indiyə kimi çıxa bilməmişəm. Panikatak oluram. Buna görə hələ də sakitləşdirici dərmanlar içirəm. Vaksin vurdursam, ürəyim dayanar, yerimdə qalaram. Söhbət tək məndən getmir, mənim kimi nə qədər insan var”.

Müğənni təkcə maaşla ailə saxlamağın çətinliyini dilə gətirib: “Çox çətinlik çəkirik. Toylar başlamasa, getdikcə vəziyyətimiz lap pisləşəcək. Biz hər şeyi çıxıb üzdə deyə bilmirik, ayıb olar. Çoxuşaqlı ailəyik, dövlətdən aldığım maaşa göz tikmişik. Universitet müəllimiyəm, teatr solistiyəm. Bunların qonorarları ilə dolanıram. Amma müğənninin xərci çoxdur. Yoldaşımın maaşı da bəs etmir.

Bacım, qardaşlarım həmişə bir-birimizə dəstək olmuşuq. Kömək etməsək, alınmır. Mənim kimi ailəsinə dəstək olan müğənnilər çoxdur. Ailəm mənə çətin vaxtımda əl tutursa, mən də onlara kömək etməliyəm. Mən xəstə olanda bacılarım mənə baxdı. Lazım gələndə bacılarımın maddi ehtiyaclarını ödəməli deyiləm?!.

Bizdən də çətin problemi olanlar var. Ona görə efirdə öz problemlərimizi açıb deyə bilmirik. Hər dəqiqə efirə çıxırıq, salonlara gedirik, geyimləri yeniləyirik. Bütün bunların hamısı puldur. Televiziyalar bizi studiyalarda bəzəmirlər, öz hesabımıza bəzənib efirə çıxırıq. Toylarsız bu qədər xərci qarşılamaq mümkün deyil.

Bir yandan övladlarımızın geyimi, qayğısı var. Aldığımız maaşla həm ailə saxlamaq, həm də işin xərclərini qarşılamaq alınmır. Bu baxımdan toyların açılması bizi çətin vəziyyətdən çıxarar. Tək maddi baxımdan deyil, psixoloji baxımdan da bu il yarımı çox çətin keçirdim. Qorxular beynimizə elə həkk olunub ki, xəstəliyə indi-indi alışıram”.

Şahanə Rəhimli
Azvision.az

Teqlər: Xalq-artisti   Toy