Milli Məclisin Mətbuat və ictimaiyyətlə əlaqələr şöbəsindən Azvision.az -a verilən məlumata görə, spiker Azərbaycanın dost Qazaxıstanla əlaqələrin inkişafına böyük önəm verdiyini bildirib. Görüşdə qardaş ölkələr arasında dostluq münasibətlərinin əsasının ulu öndər Heydər Əliyev və Qazaxıstanın birinci Prezidenti – Elbası Nursultan Nazarbayev tərəfindən qoyulduğu qeyd olunaraq, hazırda bu siyasətin Azərbaycanın və Qazaxıstanın dövlət başçıları tərəfindən uğurla davam etdirildiyi diqqətə çatdırılıb.

Spiker Sahibə Qafarova vurğulayıb ki, ikitərəfli münasibətlər parlamentlər səviyyəsində də yüksələn xətlə inkişaf edir. O, hər iki ölkənin qanunvericilik orqanlarında dostluq qruplarının əməkdaşlığını təqdir edib. Bildirilib ki, deputatların qarşılıqlı səfərləri, nüfuzlu beynəlxalq parlament təşkilatlarında mütəmadi görüşlərin keçirilməsi tərəfləri maraqlandıran məsələlərin müzakirəsi baxımından çox əhəmiyyətlidir. Spiker TÜRK PA çərçivəsində əməkdaşlığın əhəmiyyətini qeyd edib.

Səmimi qəbul üçün minnətdarlığını bildirən Qazaxıstan səfiri Serjan Abdıkarimov xalqlarımız arasında münasibətlərin qədim tarixi olduğunu deyib. Bildirilib ki, iqtisadi, mədəni, humanitar sahələrdə də əməkdaşlıq uğurla inkişaf edir.

Səfir Azərbaycanın şanlı Qələbəsinin regionda sülhün və təhlükəsizliyin möhkəmləndirilməsi işinə xidmət etdiyini bildirib. Qonaq iki ölkənin deputatlarının müxtəlif platformalarda görüşlərinin, qarşılıqlı səfərlərinin önəmini vurğulayaraq, Qazaxıstanın Azərbaycanın haqlı mövqeyini hər zaman dəstəklədiyini bildirib.

Görüşdə pandemiya, regionda baş verən hadisələr və tərəfləri maraqlandıran digər məsələlər barədə fikir mübadiləsi aparılıb.

Azvision.az