"Ahıl insanlar pandemiya zamanı daha çox təcrid olundular" - Baş katib

  01 Oktyabr 2021    Oxunub :364
"Ahıl insanlar pandemiya zamanı daha çox təcrid olundular" -    Baş katib
BMT-nin Baş katibi Antonio Quterreş 1 oktyabr Beynəlxalq Ahıllar günü ilə bağlı dünya ictimaiyyətinə müraciət edib.
Azvision.az xəbər verir ki, Beynəlxalq Ahıllar Gününün builki mövzusu “Bütün yaşlarda rəqəmsal bərabərlik"dir.

"Yaxınlarımızla əlaqə saxlayırıq. Dini ayinlərdə iştirak edirik. Fikrimizi bildiririk. COVID-19 pandemiyasına görə tətbiq edilən məhdudiyyətlərlə üzləşən fərdlər və icmalar bu və digər fəaliyyətləri daha çox onlayn həyata keçirirlər. Dünyanın texnologiyadan asılılığının artdığı bir vaxtda, ahıl insanlar bu sahədə başqaları ilə müqayisədə daha çox dəstəyə ehtiyac duyurlar."Bütün yaşlarda rəqəmsal bərabərlik" builki Beynəlxalq Ahıllar Gününün mövzusudur və cəmiyyətin inkişafı naminə müxtəlif nəsillərin nümayəndələri üçün imkanları genişləndirmək üçün mühüm bir imkan təklif edir", - müraciətdə deyilir.

Baş katib bildirib ki, ahıl insanlar pandemiya zamanı daha çox təcrid olundular: "Digər tərəfdən, onların artmaqda olan kiber cinayət təhlükəsindən zərərçəkmə riski daha yüksəkdir. Ahılları hədəfə alan vicdansız cinayətkarları məsuliyyətə cəlb etmək üçün bütün mümkün tədbirləri görməklə yanaşı, onların müdafiəsini və rifahını təmin etmək məqsədi ilə rəqəmsal bacarıqlarını gücləndirmək istiqamətində çalışmalıyıq.

Yaşlı insanlar təkcə həssas əhali qrupu deyil. Onlar bilik, təcrübə və kollektiv tərəqqimiz üçün zəngin töhfə mənbəyidirlər. Ahıllar yeni texnologiyaya çıxış əldə etməklə, onu öyrənə və istifadə edə bilsələr, yoxsulluğu aradan qaldırmaq və planetin qorumaq, habelə 2030-cu ilə qədər bütün insanlara sağlamlıq, sülh və firavanlığı təmin etmək üçün qlobal çağırışımız olam Davamlı İnkişaf Məqsədlərinə nail olmağımıza öz töhfələrini verəcəklər. Builki Beynəlxalq Ahıllar Günündə yaşından asılı olmayaraq hər kəs üçün rəqəmsal bərabərliyə nail olmaq üçün daha inklüziv siyasət, strategiya və fəaliyyətləri həyata keçirməyə çağırıram".

Pərvanə Sultanova
Azvision.az

Teqlər: BMT   Ahıllar-Günü  







Xəbər lenti