Məktəblinin şəkillərini göndərən şəxs iddia edib ki, bacısı qızını bu hala salan məktəb direktoru və başçı müavinidir: “Buna səbəb Rəsilə Əliyevanın qızının telefonundan istədiyi oğlana mesaj yazması olub. Deyilənə görə, öz qızını da döyüb, amma belə yox. Şiddət göstərməklə nə əldə edəcəyinizi bəri başdan deyim. Fakt təsdiqini taparsa, əlvida kreslo”.

Lənkəran Astara regional təhsil idarəsinin rəhbəri Elxan Nəcəfov bildirib ki, artıq məktəb rəhbərliyi ilə görüşülüb. Məktəbin direktoru Yeganə Əsgərovanın məktəbli qızı döyməsi barədə yayılan məlumat araşdırılır.

"Araşdırmanın nəticəsinə uyğun olaraq qanunamüvafiq tədbirlər görüləcək. Yeni məlumat olarsa, ictimaiyyətə əlavə informasiya veriləcək".

DİN-in Mətbuat Xidmətinin Lənkəran regional qrupunun baş inspektoru, polis baş leytenantı Məhəmməd Rzayev bildirib ki, məsələ ilə bağlı Lənkəran ŞRPŞ-yə daxil olmuş müraciət əsasında araşdırma aparılır. Müvafiq ekspertiza təyin edilib. Ekspertizanın və araşdırmanın nəticəsindən asılı olaraq məsələyə hüquqi qiymət veriləcək.





AzVision.az