Çerçesov: "Qarabağ"ın güclü və zəif tərəflərini bilirik"

   Çerçesov:    "Qarabağ"ın güclü və zəif tərəflərini bilirik"
  02 Avqust 2022    Oxunub:746
"Biz rəqibi, onlar da bizi analiz edir. Bir-birimizin güclü və zəif tərəflərini bilirik. Amma indi bunu açıqlamayacağam. Oyun sabahdır və matç zamanı bütün amilləri nəzərə almalıyıq. "Qarabağ" çox güclü komandadır".
AzVision.az -ın məlumatına görə, bunu Macarıstanın "Ferentsvaroş" komandasının baş məşqçisi Stanislav Çerçesov Bakıda "Qarabağ"a qarşı keçirəcəkləri UEFA Çempionlar Liqasının III təsnifat mərhələsinin ilk oyunundan öncə mətbuat konfransında deyib.

Rusiyalı mütəxəssis bildirib ki, sabahkı oyunda favorit yoxdur: "Slovan"a evdəki matçda uduzmuşduq. Ona görə rəqib favorit hesab olunurdu. Sabah isə hər şeyə yenidən başlayacağıq. "Qarabağ" ev, biz isə qonaq komandayıq. Bu mənada, müəyyən üstünlük ola bilər. Amma kimisə favorit adlandırmazdım. Oyun hər şeyi göstərəcək".

59 yaşlı baş məşqçi "köhlən atlar"a qarşı görüşdə hansı oyun üslubuna üstünlük vermələrinin rəqibdən asılı olacağını söyləyib: "İlk növbədə, komandamızın müəyyən oyun üslubu var. "Qarabağ"ın bizə nə dərəcədə oynamaq imkanı yaradacağından da çox şey asılıdır. İnanıram ki, baxımlı oyun olacaq".

Çerçesov Qurban Qurbanovun 14 ildir "Qarabağ"ın sükanı arxasında olmasına da toxunub: "Bir vəzifədə uzun müddət qalmaq üçün işini sevməli və mükəmməl səviyyədə bilməlisən. Həmçinin, uğur qazanmağın yollarını bilmək önəmlidir. Eyni zamanda, komandanı sevmək və klub rəhbərliyini nəticələrlə razı salmaq lazımdır".

Qeyd edək ki, avqustun 3-də Tofiq Bəhramov adına Respublika stadionunda keçiriləcək "Qarabağ" - "Ferentsvaroş" matçı saat 20:00-da başlayacaq. Cavab görüşü avqustun 9-da Budapeştdə olacaq.

AzVision.az



Teqlər:





Xəbər lenti