Azərbaycan erməni hərbçilərin meyitini təhvil verdi - Yenilənib

  Azərbaycan erməni hərbçilərin meyitini təhvil verdi -  Yenilənib
  21 İyun 2024    Oxunub:1196
Azərbaycan iki erməni hərbçinin meyitini İrəvana təhvil verib.
Bu barədə Ermənistan Milli Təhlükəsizlik Xidməti məlumat yayıb.

“Azərbaycan 2022-ci ilin sentyabrında hərbi əməliyyatlar zamanı ölən iki erməni hərbçinin qalıqlarını Ermənistana təhvil verib”, - deyə məlumatda bildirilir.

****
Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası da məlumat yayıb.

Bildirilib ki, 2023-cü ilin sentyabr ayında həyata keçirilmiş antiterror əməliyyatından sonra işğaldan azad olunmuş ərazilərdə aparılmış axtarış işlərinin nəticəsində Daşkəsən rayonu istiqamətində Buğdadağ yüksəkliyinin və Kəlbəcər rayonu istiqamətində Dəvə dağının yaxınlığında iki insana aid olduğu ehtimal edilən sümük qalıqları aşkarlanaq götürülüb. Qalıqların 2022-ci ilin sentyabr ayında Ermənistan-Azərbaycan sərhədində baş vermiş döyüş əməliyyatı zamanı həlak olmuş iki Ermənistan hərbçisinə aid olması müəyyənləşdirilib.

“Həmçinin Dövlət Təhlükəsizliyi Xidmətinin Hərbi-tibb baş idarəsinin genetik araşdırmalar mərkəzində həyata keçirilmiş molekulyar-genetik ekspertiza ilə həmin meyit qalıqlarının itkin düşmüş iki Ermənistan hərbçisinə aid olması öz təsdiqini tapıb.

Azərbaycan Respublikası xoşməramlı niyyətini və humanizm prinsiplərinə sadiqliyini növbəti dəfə nümayiş etdirərək 21 iyun 2024-cü il tarixində üçüncü tərəfin və ya hər hansı digər vasitəçinin iştirakı olmadan iki erməni hərbçisinin meyit qalıqlarını Ermənistana təhvil verib”, - açıqlamada vurğulanıb.

Həmidə İbrahimova
AzVision.az


Teqlər:





Xəbər lenti