Bildirilir ki, Rusiyanın baş naziri Dmitri Medvedev bununla bağlı müvafiq fərman imzalayıb.

“Rusiya Xarici İşlər Nazirliyi tərəfindən təqdim edilən, icra hakimiyyətinin müvafiq federal orqanları ilə razılaşdırılan və əvvəlcədən Azərbaycan, İran, Qazaxıstan və Türkmənistan tərəflərilə işlənib hazırlanan Xəzər dənizinin hüquqi statusuna dair Konvensiya layihəsi təsdiq edilsin. Rusiya prezidentinə bu Konvensiyanın imzalanması barədə təklif verilsin” - deyə fərmanda qeyd olunub.

Rusiya hökumətinin saytında dərc olunan sənəddə, həmçinin bildirilir ki, Xəzər dənizinin hüquqi statusuna dair Konvensiya layihəsi üzv ölkələrə dənizin dibi ilə boru kəmərləri çəkmək imkanı da verir. Konvensiyanın 14-cü maddəsində qeyd olunub ki, “tərəflər Xəzər dənizinin dibi ilə sualtı kabellər və boru kəmərləri çəkə bilərlər.” Lakin bu zaman beynəlxalq müqavilələrdə əks olunan ekoloji tələb və standartlara riayət olunmalıdır. Həmçinin, sualtı kabel və boru kəmərləri çəkən ölkə onların koordinatları barədə digər tərəfləri məlumatlandırmalıdır.

Sənəddə bildirilir ki, Xəzər dənizində sahilyanı ölkələrin fəaliyyəti ərazi bütövlüyü, suverenliyə hörmət, güc tətbiq etməmək və güc tətbiqi ilə hədələməmək, qarşılıqlı hörmət, əməkdaşlıq və bir-birinin daxili işlərinə qarışmamaq prinsipləri əsasında tənzimlənəcək eyni zamanda tərəflər Xəzər dənizindən sülh məqsədilə istifadə edəcəklər, problemləri sülh yolu ilə qaydasına salacaqlar, Xəzərdə silahlanma balansını qoruyacaqlar, hərbi quruculuğu Konvensiyanın bütün tərəflərinin maraqları nəzərə alınmaqla, məqbul ölçüdə həyata keçirəcəklər.

Bundan başqa, Xəzər dənizində sahilyanı ölkələr öz ərazilərini Konvensiya ölkələrinə qarşı təcavüz və hərbi əməliyyat məqsədilə açmayacaqları barədə öhdəlik götürüblər.

Qeyd edək ki, Xəzəryanı ölkələrin növbəti sammiti ilin ikinci yarısında Qazaxıstanda keçiriləcək. Həmin görüşdə Xəzər dənizinin hüquqi statusuna dair yekun Konvensiya layihəsinin dövlət başçıları səviyyəsində təsdiqlənəcəyi proqnozlaşdırılır.

Leyla Elbrusqızı
AzVision.az