AzVision.az xəbər verir ki, tədbirdə Rusiyada akkreditə olunmuş bir sıra diplomatik nümayəndəliklərin rəhbərləri və üzvləri, hərbi attaşelər, Rusiya və Azərbaycanın elm, təhsil, mədəniyyət və incəsənət xadimləri, Moskvadakı Azərbaycan icmasının tanınmış nümayəndələri və Rusiya universitetlərində təhsil alan Azərbaycan tələbələri iştirak ediblər.

Açılış nitqi ilə çıxış edən Azərbaycan Silahlı Qüvvələrinin Rusiyadakı hərbi attaşesi polkovnik Kənan Təhməzov Azərbaycan xalqının 30 ildən çoxdur ki, itirilmiş torpaqlarının ağrısı ilə yaşadığını, lakin bu illər ərzində səbirlə güclü bir dövlət və güclü bir ordu qurduğunu vurğulayıb. O, 44 günlük Vətən Müharibəsi zamanı adları cəsarət simvoluna çevrilən minlərlə qəhrəmandan bir neçəsini xatırladıb.

Polkovnik K. Təhməzov bildirib ki, Azərbaycan xalqı haqlı olaraq cəsur ordusu və Azərbaycan vətəndaşlarına və dünyadakı azərbaycanlılara qələbə sevinci bəxş edən Azərbaycan Silahlı Qüvvələrinin qalib Ali Baş Komandanı, Azərbaycan Respublikasının Prezidenti İlham Əliyevlə fəxr edir.

Daha sonra çıxış edən Azərbaycanın Rusiyadakı səfiri Rəhman Mustafayev 8 Noyabrın - Qələbə Gününün əhəmiyyətini vurğulayaraq qeyd edib ki, bu tarixi hadisə təkcə xalqımızın deyil, həm də dost və müttəfiqlərimizin qələbəsini, eləcə də beynəlxalq hüquq prinsiplərinin təntənəsini qeyd edir. Səfir vurğulayıb ki, 8 noyabrın ən vacib dərsi beynəlxalq hüquq prinsiplərinin yalnız bu prinsiplərin arxasında onu həyata keçirməyə qadir və hazır hərbi qüvvə dayandığı təqdirdə dəyərli olmasıdır.

R. Mustafayev son beş ildə 12 milyard dollardan çox vəsaitin ayrıldığı və 2026-2029-cu illər üçün əlavə 8 milyard dolların planlaşdırıldığı Azərbaycanın Qarabağ və Şərqi Zəngəzur iqtisadi rayonlarında aparılan genişmiqyaslı bərpa işlərindən danışıb. O, azad edilmiş ərazilərdə aktiv mina təmizləmə işlərinin aparıldığını, Qarabağın və qonşu rayonların mina ilə çirklənmiş ərazilərinin təxminən 20%-nin artıq təmizləndiyini bildirib.

Səfir qeyd edib ki, məcburi köçkünlərin Qarabağın dirçəldilmiş rayonlarına qaytarılması prosesi davam edir, orada daimi və müvəqqəti yaşayan əhalinin sayı təxminən 60 minə çatır. R.Mustafayev konkret nümunələrlə uzun müddətdir davam edən münaqişənin sona çatmasının Ermənistan-Azərbaycan münasibətlərinin normallaşmasına güclü təkan verdiyini göstərib.

Azərbaycan-Rusiya münasibətlərindən danışan diplomat bildirib ki, Ermənistan-Azərbaycan münaqişəsinin sona çatması və regionda sülhün bərqərar olması Bakı ilə Moskva arasında münasibətləri yeni, daha yüksək səviyyəyə - müttəfiqlik əməkdaşlığı səviyyəsinə qaldırıb. O, həmçinin Rusiyanın hərbi əməliyyatların dayandırılmasındakı mühüm rolunu və müharibədən sonrakı nizamlanmada və Ermənistan-Azərbaycan münasibətlərinin normallaşdırılmasında fəal, konstruktiv mövqeyini qeyd edib.

Səfir həmçinin vurğulayıb ki, Azərbaycan və Rusiya strateji tərəfdaşlar olub və strateji tərəfdaş olaraq qalır, onlar arasındakı münasibətlər Cənubi Qafqaz regionunda sülhün, təhlükəsizliyin və sabitliyin təmin edilməsində mühüm amildir.

Daha sonra tədbir iştirakçılarına Azərbaycanın işğaldan azad edilmiş ərazilərində həyata keçirilən tikinti, bərpa və reinteqrasiya layihələrinə həsr olunmuş video-çarx nümayiş etdirilib.

Tədbirin rəsmi hissəsindən sonra Rusiyanın Əməkdar Artisti, Baş Dirijor və Solist, professor V.İ.Voronanın bədii rəhbərliyi altında Moskva Gənclər Kamera Orkestri tərəfindən bəstəkarlar Qara Qarayev, A.Vivaldi, E.Qriq, J.Vilyams, J.Sibelius, M.İppolitov-İvanov və E.Artemyevin klassik əsərləri ifa olunub.

Gənc rusiyalı sənətçiləri və Rusiya Teatr Sənəti İnstitutunun (GİTİS) tələbələri Darya Kovalenko, Nina Bataşova və Yelizaveta Sokolova "Koroğlu" operasından və Üzeyir Hacıbəylinin "Arşın Mal Alan" operettasından ariyalar ifa ediblər.

Tədbir zamanı qonaqlar 44 günlük Vətən Müharibəsini əks etdirən fotostendlərlə tanış olublar.

AzVision.az