AzVision.az xəbər verir ki, Gəncədə keçirilən Qara Dəniz İqtisadi Əməkdaşlıq Təşkilatı Parlament Məclisinin İqtisadiyyat, Ticarət, Texnologiya və Ətraf mühit məsələləri üzrə komitəsinin 41-ci iclasını giriş sözü ilə açan Gəncə şəhər İcra Hakimiyyətinin başçısı Elmar Vəliyev bu qurumun tədbirinin Nizami yurdunda keçirilməsini əlamətdar hadisə kimi qiymətləndirdi və ekoloji tarazlığı qorumaq üçün Azərbaycan iqtisadiyyatında ən müasir, son texnologiyaların tətbiq olunduğunu söylədi. Komitənin iclasında dünyada, eyni zamanda Qara dəniz bölgəsində iqlim dəyişikliyi və onun təsiri məsələləri müzakirə olunub. Müzakirələr zamanı son illər bir çox ölkələrdə müşahidə olunan anomal iqlim dəyişikliyinə qarşı mübarizə yollarından bəhs edilib.

Kiril Trityak – QDİƏTPM-in baş katibi bildirib ki, bu günkü müzakirə hər kəsi narahat edən qlobal iqlim dəyişikliyi ilə bağlıdır. `Son illər bir sıra ölkələrdə 100 il ərzində müşahidə olunmayan anomal soyuq və qarlı hava müşahidə olunub. Bəzi ölkələrdə isə ekstrimal istilər keçir. Bizim məqsədimiz ondan ibarətdir ki, birləşərək bu anomal iqlim dəyişkənliyi ilə birgə bir mübarizə aparaq və çıxış yolları tapaq`-deyə, baş katib qeyd edib.

Komitənin Azərbaycandan olan nümayəndə heyətinin rəhbəri Asəf Hacıyev bildirib ki, müzakirənin əsas mövzusu iqlim dəyişikliyi olsa da Azərbaycan tərəfi hər iclasda Dağlıq Qarabağ münaqişəsinə toxunur.

Komitənin iclasında Türkiyə, Rusiya, Gürcüstan, Bolqarıstan, Yunanıstan, Serbiya, Rumıniya və Ukraynadan olan nümayəndələr iştirak ediblər. Gündəlikdə duran digər məsələ isə Qara Dəniz İqtisadi Əməkdaşlıq Təşkilatı Parlament Məclisinin İqtisadiyyat, Ticarət, Texnologiya və Ətraf mühit məsələləri üzrə komitəyə sədr seçilməsi ilə bağlı olub. Nümayəndə heyətlərinin yekdil qərarı ilə Azərbaycan nümayəndə heyətinin üzvü, millət vəkili Musa Quliyev komitənin yeni sədri seçilib.

AzVision.az