"ATƏT qanunsuz seçkilərin qarşısını almalıdır" - Günel Səfərova

11:23   13 Sentyabr 2017    Oxunub: 715
"ATƏT qanunsuz seçkilərin qarşısını almalıdır" - Günel Səfərova

Polşanın paytaxtı Varşava şəhərində ATƏT-in Demokratik İnstitutlar və İnsan Haqları Ofisinin təşkil etdiyi illik Zirvə Toplantısı öz işini davam etdirir. Tədbirdə ATƏT üzvü olan 57 ölkənin nümayəndələri – səfirlər, diplomatlar, beynəlxalq təşkilatların rəhbərləri, habelə hüquq müdafiəçiləri və ictimai-siyasi fəallar iştirak edirlər.

Sentyabrın 12-də “Demokratik institutlar, demokratiya və seçkilər” mövzusunda keçirilən müzakirələrə qatılan "Gənc Vətəndaş" Maarifləndirmə İctimai Birliyinin icraçı direktoru Günel Səfərova Azərbaycanda keçirilən seçkilərdən danışıb.

Hansısa bir ölkənin seçkilərdə hər hansı nöqsandan sığortalanmadığını deyən Günel Səfərova Azərbaycanda da indiyədək keçirilən seçkilərdə müəyyən nöqsanlar olduğunu vurğulayıb. O, son parlament seçkilərində müxalifətdən namizəd olduğunu deyərək, Azərbaycanda seçkilərin ümumilikdə qaydalara uyğun keçirildiyini qeyd edib: "Azərbaycanda parlament seçkilərinə hazırlıq və səsvermə prosesi peşəkarlıqla, texniki baxımdan yaxşı təşkil olunur. Seçkilər ölkənin Seçki Məcəlləsinə uyğun keçirilir. Azərbaycanda qadınların seçkilərdə fəal iştirakı təqdirəlayiqdir".

"Gənc Vətəndaş" İctimai Birliyinin icraçı direktoru insan hüquqlarını qorumağı özünə vəzifə bilən beynəlxalq qurumları müharibə qurbanları olan yüz minlərlə qaçqının taleyinə biganəlikdə günahlandırıb: "Azərbaycanın Ermənistan tərəfindən işğal olunmuş ərazilərində yaradılmış qondarma rejimin keçirdiyi saxta seçkilər beynəlxalq aləmdə tanınmır. Qeyri-qanuni və saxta seçkilər Azərbaycan Respublikasının Konstitusiyası, qanunları və beynəlxalq hüququn norma və prinsiplərinin açıq şəkildə pozulmasıdır. Qondarma seçkilərə müşahidəçi adı altında bəzi Avropa siyasətçiləri cəlb olunur, bu xüsusda məqsədyönlü siyasət aparılır ki, qanunsuz seçkilərə legitimlik donu geyindirilsin. Bu cür davranış ATƏT-in təməlini təşkil edən Helsinki Yekun Aktına köklü ziddir. ATƏT bu kimi halları nəzərə almalı va qanunsuz seçkilərin və saxta müşahidəçiliyin qarşısını almalıdır".

Günel Səfərova bir məsələni də xüsusi qeyd edib ki, bu tipli toplantılarda konfliktli regionlar haqqında danışmağı bir ölkə qadağan edə bilməz.



Teqlər:




Rubrikanın digər yazıları