AMEA-da yeni təyinatlar olub

  17 Oktyabr 2017    Oxunub : 1400
AMEA-da yeni təyinatlar olub

Azərbaycan Milli Elmlər Akademiyasının Humanitar Elmlər Bölməsinin növbəti Büro iclası keçirilib.

AMEA-nın mətbuat xidmətindən AzVision.az-a verilən məlumata görə, tədbirdə bölmə üzvləri, elmi müəssisələrin rəhbərləri və Gənclər üçün Prezident təqaüdünə namizədlər iştirak ediblər. Bölmənin akademik-katibi, akademik Teymur Kərimli iclası giriş sözü ilə açaraq iştirakçıları gündəlikdəki məsələlərlə tanış edib.

Tədbirdə ilk olaraq Memarlıq və İncəsənət İnstitutunun direktoru, AMEA-nın müxbir üzvü Ərtegin Salamzadə "Türk incəsənətinin dövrləşdirilməsi problemi" mövzusunda məruzə ilə çıxış edib. Alim türk dünyası sənət tarixinin yaradılması yolunda əsas məsələlərdən biri olan dövrləşmənin xüsusiyyətlərindən danışıb. Ə.Salamzadə bildirib ki, məruzədə Azərbaycan, Özbəkistan, Qazaxıstan, Türkmənistan və Qırğızıstanın incəsənət tarixi dövrləşdirilməsinin milli modelləri araşdırılıb. Natiq qeyd edib ki, müqayisəli təhlil nəticəsində eyni xronologiya hüdudlarında olan bəzi məzmunlu aspektlərin ümumiliyi, bəzənsə hətta eyniyyəti üzə çıxır.

Məruzəçi vurğulayıb ki, dövrləşmə üsulları metodoloji yanaşmalar üzrə fərqlənir. O, müasir sənətşünaslıqda dövrləşməyə daha çox xronoloji və sülalə yanaşması kimi iki yanaşma tərzinin tələb olunduğunu söyləyib.

Ə.Salamzadə hazırda Türk sənətinin ümumi özəlliklərinin tədqiqinin və ümumi dövrləşmə sisteminin təyin olunmasının, türk bölgələrin incəsənətinin ümumi süjet, motiv və formalarının araşdırılmasının vacibliyini vurğulayıb. Məruzə dinlənildikdən sonra müzakirə olunub, suallar cavablandırılıb, müvafiq qərar qəbul olunub.

Sonra elmi-təşkilati məsələlər müzakirəyə çıxarılıb. Memarlıq və İncəsənət İnstitutunun ümumi işlər üzrə direktor müavini, sənətşünaslıq üzrə fəlsəfə doktoru Xəzər Zeynalovun institutun elmi işlər üzrə direktor müavini, sənətşünaslıq üzrə fəlsəfə doktoru Vüqar Kərimlinin institutun elmi katibi, Sərvər Şirinovun Hüseyn Cavidin Ev Muzeyinin elmi katibi vəzifələrinə təyin olunmaları, həmçinin Nizami Gəncəvi adına Milli Azərbaycan Ədəbiyyatı Muzeyinin Elmi şurasının tərkibində dəyişiklik edilməsi ilə bağlı Rəyasət Heyətində vəsatət qaldırılması qərara alınıb.

Tədbirdə kadr məsələlərinə də baxılıb. Bölmə sənətşünaslıq üzrə elmlər doktoru, professor Kübra Əliyevanın Memarlıq və İncəsənət İnstitutunun Qafqaz Albaniyasının memarlıq və incəsənəti şöbəsinin müdiri vəzifəsinə təsdiq edib. Məhəmməd Füzuli adına Əlyazmalar İnstitutunun əyani doktorantı Ədibə İsmayılovanın isə qiyabi təhsil formasına keçirilməsi qərara alınıb.

Sonda cari məsələlərə baxılıb. Məşhur heykəltəraş, Azərbaycan Respublikasının xalq rəssamı, Azərbaycan Rəssamlıq Akademiyasının rektoru, AMEA-nın həqiqi üzvü Ömər Eldarovun 90 illik yubileyinin keçirilməsi ilə bağlı Rəyasət Heyəti qarşısında vəsatət qaldırılması qərara alınıb. Bölmə Nəsimi adına Dilçilik İnstitutun Terminologiya şöbəsinin elmi işçisi, filologiya üzrə fəlsəfə doktoru Aysel Qəriblinin və Nizami Gəncəvi adına Ədəbiyyat İnstitutunun İctimaiyyətlə əlaqələr şöbəsinin müdiri, filologiya üzrə fəlsəfə doktoru Mehman Həsənovun Gənclər üçün Prezident təqaüdünə namizədliklərinin AMEA-da yaradılmış Gənclər üçün Prezident təqaüdünə namizədlərin seçilməsi üzrə Ekspert Komissiyasına təqdim olunması haqqında qərar qəbul edib.

AzVision.az

Teqlər: AMEA