Aİ-nin Cənubi Qafqaz üzrə yeni nümayəndəsi məlum oldu

  13 Noyabr 2017    Oxunub : 994
Aİ-nin Cənubi Qafqaz üzrə yeni nümayəndəsi məlum oldu

Avropa İttifaqının (Aİ) Gürcüstan və Cənubi Qafqaz üzrə xüsusi nümayəndəsi seçilib.

AzVision.az-ın məlumatına görə, Aİ Şurasının qəbul etdiyi qərara əsasən bu vəzifəni estoniyalı diplomat Tayvo Klaar icra edəcək.

Qeyd edək ki, Klaar 2013-2014-cü ildə Gürcüstanda Aİ Müşahidəçilər Missiyasının (EUMM) rəhbəri olub. O, 2012-ci ilin martından Gürcüstandakı missiyasına qədər isə Avropa Xarici Əlaqələr Servisində (EEAS) insan resursları sahəsində siyasət və koordinasiya şöbəsinin rəisi olub.

Buna qədər isə Klaar prezident Lennar Merinin xarici məsələlər üzrə müşaviri, XİN-də siyasi məsələlər və Aİ işləri üzrə baş direktor, həmçinin müdafiə nazirinin müşaviri də olmaqla Estoniyada bir sıra vəzifələr tutub. Klaar Harvard Universiteti Con F. Kennedi hökumət məktəbində dövlət idarəçiliyi üzrə magistr təhsili alıb.

Xatırladaq ki, buna qədər Aİ-nin Cənubi Qafqaz üzrə xüsusi nümayəndəsi Almaniyalı deputat Herbert Salber idi.

Eldar Tanrıverdiyev
AzVision.az

Teqlər:   Azərbaycan