Nazirlik kömür hazırlayanlara qarşı reydlər keçirir

  15 Noyabr 2017    Oxunub : 325
Nazirlik kömür hazırlayanlara qarşı reydlər keçirir

Ekologiya və Təbii Sərvətlər Nazirliyinin əməkdaşları tərəfindən respublika ərazisində yerli meşə materiallarının qanunsuz yolla əldə edilməsi, daşınması, ağac emalı sexlərində istifadə olunması, eləcə də ağac kömürünün hazırlanması və satışı hallarının qarşısının alınması məqsədilə 06-11 noyabr 2017-ci il tarixlərində növbəti reydlər keçirilib.

Nazirlikdən AzVision.az-a verilən xəbərə görə, Oğuz rayonu ərazisində keçirilən reydlər zamanı Muxas, Sincan, Mollalı və Calut kəndlərinin 27 həyətyanı sahəsində və pay torpaqlarında ağac kömürü hazırlanması məqsədilə quyuların qazıldığı, qanunsuz yolla əldə edilmiş 102,99 m3 həcmində meşə materiallarından istifadə edildiyi və meşə fonduna 2091,62 manat məbləğində ziyan dəydiyi müəyyən olunub. Faktlarla bağlı təqsirkar şəxslər barəsində aktlar tərtib edilib və qanunamüvafiq tədbirlərin görülməsi üçün sənədlər rayon polis şöbəsinə göndərilib.

Eyni zamanda Oğuz rayonu Muxas bələdiyyəsinin mülkiyyətinə aid torpaq sahəsində kömür hazırlamaq məqsədilə 84 ədəd quyunun qazıldığı və təbiətə 2310 manat məbləğində ziyan vurulduğu müəyyən olunub. Faktla bağlı akt tərtib edilib və gələcəkdə belə hallara yol verilməməsi üçün Muxas bələdiyyəsinə icrası məcburi olan müddətli “məcburi göstəriş” verilib. Toplanmış materiallar məsələyə hüquqi qiymət verilməsi və təqsirkarlar barəsində qanunamüvafiq tədbirlərin görülməsi üçün Oğuz rayon Prokurorluğuna göndərilib. Reydlər zamanı aşkar olunan kömür quyuları ləğv edilib.

Həmçinin reydlər zamanı Şəmkir rayonu Düyərli kəndində Yaşar Qənbərov və Azər Verdiyevə, Dəllər qəsəbəsində Rasim Sadıqova, Tovuz rayonu Tovuzçay çayı sahilində Sarxan Mirzəyevə, Qovlar qəsəbəsində Coşqun Binnətova məxsus yeşik sexlərində ümumilikdə 9,6 m3 həcmdə 1908,12 manat nırx dəyərində meşə materialları aşkar olunub. Təqsirkarlar barəsində akt və protokollar tərtib edilib. Hazırda reydlər davam etdirilir.

AzVision.az

Teqlər: Oğuz