Ukraynalı politoloq, Siyasi analiz və menecment üzrə Ukrayna İnsititutunun rəhbəri Ruslan Bortnik ölkəsində baş verən hadisələri AzVision.az-a eksklüziv şərh edib.

R.Bortnik bildirib ki, Ukraynada yaşananlar hakimiyyət uğrunda baş verən mübarizənin bir hissəsidir. Onun sözlərinə görə, Saakaşvili Ukraynada o qədər də populyar siyasətçi deyil: "Onun reytinqləri düşünüldüyü kimi elə də yüksək deyil. Saakaşvili Poroşenko əleyhinə, hakimiyyətə qarşı etirazın simasıdır. Bir daha qeyd edim ki, bu, hakimiyyət uğrunda mübarizənin bir hissədir. Cəmiyyət arasında hakimiyyətin, Poroşenko rejiminin nüfuzunu aşağı salmağa çalışırlar. Ölkədəki qeyri-sabitlik müxalifətin xeyrinədir. Hadisələrin bundan sonra necə cərəyan edəcəyini demək olduqca çətindir. Bütün bunlar hakimiyyətin və ya müxalifətin konkret olaraq hansı addımlar atacağından asılıdır".



Politoloq hesab edir ki, Saakaşvili azadlığa çıxsa da, Kiyevdə etirazlar davam edəcək. Buna baxmayaraq Ukraynada "Yeni Maydan" olmayacaq.

"Hazırda baş verənlər Ukrayna müxalifətinin xeyrinədir. Onlar yaranmış vəziyyətdən hakimiyyətə qarşı istifadə edirlər. Çünki hakimiyyət bununla Qərbin, cəmiyyətin dəstəyini itirir. Hazırki durum bu prosesdə iştirak etməyənlərin xeyrinədir. Bundan sonra nələrin baş verəcəyini zaman göstərəcək. "Yeni Maydan" isə məncə, baş tutmayacaq"- R.Bortnik vurğulayıb.

Eldar Tanrıverdiyev
AzVision.az