Paytaxt sakinləri ərzağa 7,5 milyard xərcləyib

  27 Dekabr 2017    Oxunub : 531
Paytaxt sakinləri ərzağa 7,5 milyard xərcləyib

Cari ilin yanvar-noyabr aylarında Bakının elektrik enerjisi, qaz və buxar istehsalı, bölüşdürülməsi və təchizatı sektorunda 491 milyon manat dəyərində məhsul istehsal olunub və xidmətlər göstərilib.

Bakı Şəhər Statistika İdarəsindən AzVision.az-a bildirilib ki, hesabat dövründə bu sektorda istehsalın həcmində əvvəlki ilin yanvar-noyabr ayları ilə müqayisədə 24,3 faizlik artım müşahidə olunub. Su təchizatı, tullantıların təmizlənməsi və emalı sektorunda istehsal edilmiş məhsulların həcmi isə 20,9 faiz artaraq 205,6 milyon manat təşkil edib.

Bundan başqa bu ilin yanvar-noyabr aylarında Bakıda 1 milyon 718,4 min ton dizel yanacağı istehsal edilib. Hesabat dövründə paytaxtda 1 milyon 97,6 min ton avtomobil benzini, 169 min ton neft-kimya sənayesində istifadə üçün benzin, 539 min ton ağ neft, 262,5 min ton yanacaq mazutu, 33,6 min ton sürtkü yağları, 208,8 min ton neft bitumu və 197,5 min ton neft koksu istehsal olunub.

2017-ci ilin yanvar-noyabr aylarında pərakəndə ticarət dövriyyəsinin həcmi 2016-cı ilin yanvar-noyabr aylarına nisbətən müqayisəli qiymətlərlə 2,9 faiz artaraq 16601,0 milyon manat olub. Ticarət şəbəkəsində satılan ərzaq məhsulları, içkilər və tütün məmulatlarının dəyəri əvvəlki ilin müvafiq dövrü ilə müqayisədə 2,5 faiz artaraq 7539,6 milyon manata, qeyri-ərzaq məhsullarının həcmi isə 3,6 faiz artaraq 9061,4 milyon manata bərabər olub.

İstehlak məhsullarının 19,5 faizi hüquqi şəxs statuslu müəssisələrdə, 67,6 faizi fərdi sahibkarlara məxsus ticarət obyektlərində, 12,9 faizi isə paytaxtın məhsul bazarlarında satılıb. Cari ilin yanvar-noyabr aylarında elektron qaydada pərakəndə ticarət şəbəkəsində 40,1 milyon manatlıq və ya 2016-cı ilin eyni dövrünə nisbətən müqayisəli qiymətlərlə 3,6 dəfə çox istehlak məhsulları satılıb. Elektron şəbəkə vasitəsi ilə əhalinin sifariş verdiyi istehlak məhsullarının 98,0 faizi hüquqi şəxslərdən, 2,0 faizi isə fərdi sahibkarlardan alınıb. Satışın bu növü vasitəsilə əsasən qeyri-ərzaq məhsullar realizə olunub.

AzVision.az

Teqlər: Bakı-Şəhər-Statistika-İdarəsi