Türkiyə xəbərdarlıq etdi: ABŞ YPG-ni Menbiçdən çıxarır

Türkiyə xəbərdarlıq etdi: ABŞ YPG-ni Menbiçdən çıxarır
  16 Fevral 2018    Oxunub:2487
“Keçmişdə də belə kritik mərhələlər olub. Amma hər zaman bu müttəfiqliyi ön planda tutaraq kritik mərhələləri birlikdə keçdik. İndi də kritik mərhələdiyik. Ötən gün ölkə başçısı ilə birlikdə keçirdiyimiz üçtərəfli görüşdə tərəflər düşüncələrini, narahatlıqlarını söylədilər. Bundan sonra əlaqələrimiz ya yaxşılaşmağa, ya da daha da pisləşməyə doğru gedəcək”.
AzVision.az xəbər verir ki, bu fikirləri Türkiyənin xarici işlər naziri Mövlud Çavuşoğlu ABŞ dövlət katibi Reks Tillersonla Ankarada keçirdiyi mətbuat konfransında deyib.

“Bizim narahatlığımız birbaşa bizə qarşı olan təhdidlərlə, YPG hücumları ilə bağlıdır. İnsanlarımız ölür. 2016-cı ildə ABŞ-ın Türkiyəyə verdiyi sözlərin heç birinə əməl olunmadı. İndi YPG-nin Fəratın şərqinə çəkilməsi əmin olmalıyıq. İlk olaraq YPG-nin Menbiçdən çıxması lazımdır”, - Çavuşoğlu bildirib.

Tillerson isə deyib ki, ABŞ və Türkiyə arasındakı əlaqələr dərindir: “Türkiyə və ABŞ bir çox yerdə birlikdə hərəkət edib. Artıq iki müttəfiq ölkə ayrılıqda hərəkət etməyəcək. Biz birlikdə Suriyadakı bütün problemləri dəyərləndirəcəyik. Birlikdə hərəkət edəcəyik. İŞİD-lə mübarizə aparacağıq. Ərazilərin təhlükəsizliyini təmin edəcəyik. Görüləcək çox iş var. Sürətlə başlamalıyıq. Bu istiqamətdə iş aparacaq ilk qrup martın ortasında toplanacaq. Lakin vacib məqam olduqda biz gözləməyəcəyik, hərəkət edəcəyik”.

Tillerson daha sonra bildirib ki, ABŞ Türkiyənin terrorizmlə bağlı qarşılaşdığı problemlərdən xəbərdardır: "Amma, müstəqil və birləşmiş Suriyanın qurulmasında birlikdə hərəkət etməliyik. ABŞ Suriyada bölünmə olmadan, həllə nail olmaq istəyir. Dərhal Menbiç məsələsi ilə məşğul olacağıq. Şimali Suriya ilə bağlı fəaliyyətimiz isə davam edir”.

Elvin Abdulqədirov
AzVision.az



Teqlər: ABŞ   Türkiyə   YPG   Terror  





Xəbər lenti


Azvision.az ©2014 | Bütün hüquqları qorunur